Алматыда кезекте тұрған азаматтарға жалдамалы тұрғын үй бөлудің кезекті кезеңі басталды. Отбасы банк пәтер алу мүмкіндігі туған үміткерлерге 1414 нөмірінен SMS-хабарлама жолдап жатыр, – деп жазады Ertenmedia.kz.
Жаңа кезеңде алдыңғы үлестіруден қалған 300 пәтер ұсынылады. Бұған дейін 816 жалдамалы баспана кезекте тұрған азаматтарға берілген. Қалған пәтер электронды кезек тәртібімен келесі үміткерлерге бөлінеді.
Хабарлама алған азамат orken.otbasybank.kz порталына кіріп, жеке кабинетін тексеруі қажет. Жүйеде кезектің келгені және пәтердің бөлінгені жөніндегі ақпарат көрсетіледі. Одан кейін міндетті түгендеу рәсімінен өту керек.
Түгендеу аяқталған соң үміткер ұсынылған баспананы қабылдау немесе одан бас тарту жөнінде шешім қабылдайды. Жауап беруге тура бес жұмыс күні беріледі. Белгіленген мерзімде шешім расталмаса, пәтер алу құқығы жойылады.
Мұндай жағдайда баспана кезекте тұрған келесі азаматқа автоматты түрде ұсынылады. Сондықтан 1414 нөмірінен келген хабарламаны назардан тыс қалдырмаған жөн. Жеке кабинеттегі ақпаратты да күн сайын тексеріп отырған дұрыс.
Отбасы банк ресми хабарламалар тек 1414 нөмірінен жіберілетінін ескертті. Азаматтарға күмәнді сілтемелерге өтпей, мәліметті банктің ресми порталы арқылы тексеру ұсынылады. SMS-код пен жеке деректі бөгде адамға беруге болмайды.
Бұған дейін жалдамалы тұрғын үйді үлестіру жүйесіне қатысты азаматтар тарапынан бірқатар сұрақ туындаған. Көпшілік тізімде бір фамилияның бірнеше рет кездесуін, пәтерден бас тартқан жағдайда кезектің сақталуын және 1414-тен келген хабарламаның мәнін сұрады. Отбасы банк әр өтінім электронды жүйе арқылы жеке қаралатынын түсіндірді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
