Ақтөбедегі Оңтүстік-Батыс тұрғын алабының тұрғындары көшелерді абаттандыруға бөлінген миллиардтаған теңгенің қайда жұмсалғанын тексеруді талап етіп отыр, деп жазады Ertenmedia.kz.
Tengrinews.kz дерегіне сүйенсек, 2024 жылы Ақтөбе қаласының шетіндегі Оңтүстік-Батыс тұрғын алабында бірден 22 көшені абаттандыруға арналған ауқымды жоба басталған. Жол жөндеу, жарық орнату және инженерлік желіні реттеу жұмысына бюджеттен 7,7 млрд теңге бөлінген.
Алайда тұрғындардың айтуынша, жаңа асфальт, қауіпсіз тротуар мен жарықтың орнына аудан бірнеше жылдан бері қазылған көше, батпақ, шұңқыр және бітпейтін уәдемен қалып отыр.
Жергілікті жұрт шенеуніктермен тағы да кездесіп, жобаның нақты қашан аяқталатынын сұраған. Бірақ кездесу басынан-ақ дауға ұласқан. Тұрғындар бұрынғыдай сабыр сақтап, кезекті түсіндірмені тыңдауға дайын болмады. Олар нақты мерзім, жауапты тұлға және қаражаттың жұмсалуына қатысты ашық есеп талап етті.
Ақтөбе жол дауы әкімдікті тығырыққа тіреді
Әр жаңбырдан кейін Оңтүстік-Батыстың көшелері лайсаңға айналады. Тұрғындар аудан ішінде жаяу жүру де, көлікпен қозғалу да қиын екенін айтады.
Бірнеше жылдан бері жұрт өз күшімен қиыршық тас сатып алып, жолды уақытша тегістеп келеді. Әйтпесе көлік тұраққа кіре алмайды, балалар мектепке немесе емханаға барарда батпаққа батады.
Аудан тұрғыны Айгүл Әлімбаеваның айтуынша, бұрын көшеде қалыпты төсеніш болған, адамдар емін-еркін жүретін. Екі жыл бұрын бәрі алынып, жол қазылған күйі қалған. Жаңбыр жауса, айнала шалшық пен батпаққа толады. Тұрғындар балаларын қақпадан шығаруға қорқатын жағдайға жеткен. Жыл сайын өз қаражатына қиыршық тас төгіп, ең болмаса адамдар жүретін, көлік қоятын жол жасауға мәжбүр.
Ақтөбеліктердің айтуынша, осы уақыт ішінде толық аяқталған жұмыс көрінбеген. Техника бірнеше күнге келеді, кейін жұмыс қайта тоқтайды. Уақыт өте мердігер ауысады, бірақ мәселенің түйіні шешілмейді. Бір компания бастайды, кейін айлар бойы қозғалыс болмайды. Қыс түседі, мердігер кетеді. Келесі жылы басқа ұйым келеді. Осындай ауыс-түйістен кейін тұрғындар кімнен жауап сұрарын білмей қалған.
Тротуардың жоқтығы балалар мен қарттарға ерекше қиындық туғызып отыр. Тұрғын Олеся Өтегенованың сөзінше, қатты жаңбырдан кейін өзі емханаға бара жатқанда құлап қалған. Балалар да батпаққа тайып жығылатын жағдай жиі болады. Ауданда велосипед тебетін, қауіпсіз жүретін орын жоқ. Жұрт жыл бойы резеңке етікпен жүруге мәжбүр. Қала ішіндегі ірі тұрғын алаптағы жағдай тұрғындардың пікірінше, қараусыз қалған ауылға ұқсап кеткен.
Жұрттың ашуын күшейтіп отырған негізгі мәселе, бөлінген қаражат көлемі. 7,7 млрд теңге қарастырылған жоба нәтижесінде аудан әлдеқашан жол, жарық, тротуар көруі керек еді дейді тұрғындар. Алайда кей көшеде бордюр қойылып, кейін қайта бұзылған. Кей жерде асфальт төсеу әрекеті бірнеше рет жасалғанымен, қыс өткен соң жабын қайта бүлінген.
Ақтөбе тұрғыны Құрманғали Мұзбаев қаражаттың қайда кеткенін тексеру қажет деп санайды. Оның айтуынша, бір жерге бордюр қойылады, кейін қайта алынады. Тайманов көшесін бірнеше рет асфальттамақ болған, бірақ қыс өткен сайын жабын қармен бірге кетеді. Тұрғын мұны жауапсыздық деп бағалап отыр.
Қазылған көше, жоғалған сенім
Қала әкімдігі алғашқы мердігермен күрделі мәселе болғанын мойындайды. Ресми мәліметке қарағанда, компания тек алты көшеге ішінара асфальт төсеп үлгерген. Кейін сол жабын зертханалық тексерістен өтпеген. Осыдан соң мердігер жұмыстан шеттетіліп, жоба басқа ұйымға берілген.
Әкімдік дерегінше, жаңа компанияға 1 млрд теңгеден астам қаржы төленген. Бірақ тұрғындар ауданның жағдайы түбегейлі өзгермегенін айтады. Көшелер әлі қазылған, жаңбыр жауса, батпақ қайта басталады. Мердігер ұйым жұмыстың созылуын техникалық қиындықпен түсіндіреді.
Субмердігер ұйым директоры Мұратхан Мадияровтың айтуынша, жер асты суы көтеріліп, соның салдарынан ақаулар пайда болған. Биыл компания 500 млн теңге аванс алған. Аталған қаржы үш көшені асфальттауға арналған. Жұмысты жаздың соңына дейін аяқтау жоспарланып отыр. Қалғаны келесі қаржыландыруға байланысты. Жалпы жобаға 7 млрд теңгеден астам қаражат қарастырылған.
Ақтөбе қалалық тұрғын үй-коммуналдық шаруашылық бөлімінде бұрын төселген асфальттың бір бөлігі толық қайта жасалатынын хабарлады. Бөлімнің бас маманы Әділбек Ахметтің айтуынша, бұрынғы асфальт зертханалық сынақтан өтпегендіктен, қазір сыпырылып алынып, қайта төселеді. Сонымен қатар инженерлік желіні нормативке сай келтіру қажет. Бұрынғы мердігерге қатысты сотқа талап арыз берілген, алайда ол әлі жосықсыз деп танылмаған.
Миллиард бөлінді, жол бітпеді
Биыл жобаға әзірге 500 млн теңге бөлінген. Әкімдік өкілі аталған қаржы үш көшені асфальттау және абаттандыру жұмысына жететінін айтты. Одан кейін кезекті траншты күту қажет болады.
Оңтүстік-Батыс тұрғындары уәдеден шаршағанын жасырмайды. Олар үшін мәселе тек жолдың сапасында жатқан жоқ. Әңгіме бюджет қаржысының тиімділігі, мердігер жауапкершілігі, әкімдік бақылауы және қала шетіндегі тұрғындардың өмір сүру сапасы туралы болып отыр.
Бұған дейін осы жобаға қатысты Антикоррупциялық қызмет те қызығушылық танытқаны айтылған. Тұрғындар енді тек жөндеу жұмысының аяқталуын ғана емес, бөлінген қаражаттың толық тексерілуін күтеді. Себебі миллиардтаған теңге бөлінген ауданның бірнеше жыл батпақ кешіп жүруі қоғам алдында да, құқықтық тұрғыда да нақты жауапты қажет етеді.
Синоптиктердің мәліметінше, суық ауа массасы алдағы күндері де елдегі ауа райына ықпал етеді. Әсіресе түнгі уақытта солтүстік, шығыс және орталық өңірлерде минус температура сақталады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
