Мәжіліс депутаты Жұлдыз Сүлейменова Семейде шырша құру кезінде құлаған мұғалімнің оқиғасынан кейін кінәлілердің бәрін жазалауды талап етті, — деп хабарлайды ErtenMedia.kz.
Депутат сауалын Бас прокурор Берік Асыловқа жолдады.
«21 желтоқсанда №49 мектептің қазақ тілі мен әдебиеті пәнінің мұғалімі, 49 жастағы Қуат Айтқалиев орталық алаңда жаңа жылдық шыршаны безендіру кезінде жоғары биіктен құлап, ауыр жарақат алған. Қазір жағдайы өте ауыр», — деді ол.
Жұлдыз Сүлейменова «Педагог мәртебесі туралы» заң бойынша мұғалімдер артық міндеттерден қорғалуы қажет екенін еске салып, бұл жағдай заңды өрескел бұзып тұрғанын айтты.
Депутат мұғалімдерді заңсыз жұмысқа тарту шешімін қабылдаған және «Педагог мәртебесі туралы» заңды бұзған тұлғаларды анықтап, қатаң жауапкершілікке тартуды сұрады.
«Бүгінгі таңда мектеп директорлары мен білім бөлімінің басшылары ғана жауапкершілікке тартылған, бұл әділетсіз және қисынсыз деп санаймыз. Сондықтан осы шешімді берген барлық тұлға анықталып, жауапкершілікке тартылсын», — деді ол.
Жұлдыз Сүлейменова тағы бірнеше ұсыныс жасады:
- Зардап шеккен мұғалімге толық медициналық көмек көрсетуді және заңды өтемақы төлеуді, оның ішінде Педагогтың алған жарақатын өндірістік жарақат деп тануды және оған өмір бойы өндірістік жарақатқа берілетін төлемді тағайындауды қарастыруды сұраймыз.
- Семей қаласында шыршасын орнату мен безендіруге бөлінген қаражатты тексеріп, бюджет қаражатын мақсатсыз пайдаланғандар болса, оларды заң аясында жауапкершілікке тарту қарастырылсын.
- «Педагог мәртебесін туралы» Заң талаптарын сақтамау жағдайларына байланысты барлық білім беру ұйымдарында тексеріс жүргізіп, Мұғалімдердің құқықтары мен қауіпсіздігін қамтамасыз ету бойынша қосымша шаралар қабылдауды ұсынамыз.
- Қазақстан Республикасының Бас прокуратурасынан осы мәселені жеке бақылауға алып, кінәлілерді жауапқа тартып және зардап шеккен жағдайы ауыр педагогтың құқықтарын толық қорғауды қамтамасыз етуде нақты шаралар қабылдауды сұраймыз.
