Елордада өткен «Бірлік жүгірісі – 2025» шарасы Қазақстан халқы Ассамблеясының 30 жылдығына арналған маңызды оқиға ретінде есте қалды. 3000-нан астам тұрғын мен қонақ бір мақсатқа бірігіп, салауатты өмір салтын, бірлік пен достықты қолдауға шықты.
Жарыс жолына жасөспірімдер де, тәжірибелі желаяқтар да, ерекше қажеттілігі бар азаматтар да, түрлі этностардың өкілдері де қатар тұрды.
Қатысушылар Астананың символына айналған «Бәйтерек» маңынан бастап, ЭКСПО алаңын басып өтіп, Түркістан мен Ақмешіт көшелері арқылы қайтып оралды. Бұл жай ғана спорттық шара емес, ұлттар достығы мен қоғамдық келісімді бейнелейтін үлкен азаматтық іс болды.
Марафон кезінде бірқатар қашықтықтар ұсынылып, әр адам өз мүмкіндігі мен қалауына сай жарыс форматын таңдады. Балалар мен инклюзивті топтар үшін 1 шақырымға жүгіріс ұйымдастырылды, скандинавиялық жүрістің қатысушыларына 5 шақырымдық бағыт белгіленді.
Ал кәсіби желаяқтар 10 және 21,1 шақырымды еңсерді. Командалық рух пен серіктестікке негізделген эстафеталық жүгіру де көпшіліктің қызығушылығын тудырды. Әр команданың құрамында кем дегенде бір әйел адамның болуы – бұл спорттағы тең мүмкіндіктің айқын белгісі. Іс-шара соңында қатысушылар жүлде ойнатуларына қатысып, көтеріңкі көңіл күймен тарасты.
Жарыс аяқталғаннан кейін көптеген қатысушылар айналаны тазалап, «Таза Қазақстан» экологиялық бастамасына өз үлесін қосты. Осылайша, олар тек спортпен шектеліп қалмай, қоршаған ортаға да қамқорлық танытты.
Ал бұл қоғамның экология мен денсаулық мәселелеріне бейжай қарамайтынын көрсетеді. Бірлік күніне арналған мерекелік бағдарламаның жалғасы ретінде елордада концерттер, көрмелер мен викториналар, түрлі спорттық сайыстар ұйымдастырылды. Әрбір тұрғын өзін елдің, қаланың, қоғамның бір бөлшегі ретінде сезінді.
Осындай үлкен ауқымды іс-шаралардың өтуі Астана қаласының әлеуметтік белсенділігін, тұрғындарының азаматтық жауапкершілігін және елорда әкімдігінің жүйелі жұмысын дәлелдейді.
Ассамблея мерекесін бірлікпен атап өткен елорда жұртшылығы үшін мұндай жүгіріс денсаулықты ғана емес, рухты да серпілтетін маңызды оқиға болды. Қаланың инфрақұрылымдық мүмкіндіктері, қауіпсіздік шаралары мен ұйымдастырушылық деңгей – мұның барлығы елордада бұқаралық спортты дамытуға зор үлес қосып жатқанын айғақтайды.
