Қазақстанда педагогтарды аттестаттау тәртібіне өзгеріс енгізу мәселесі қарастырылып жатыр, деп хабарлайды Ertenmedia.
Бұл туралы Оқу-ағарту министрі Жұлдыз Сүлейменова елордада өткен мем.оргындар мен ауылдық округ әкімдерімен кездесу барысында мәлім етті.
Министрдің айтуынша, аттестаттау ережесін қайта қарауға мұғалімдердің өзінен түскен көптеген ұсыныс негіз болып отыр.
Басқосуда магистратура бітірген педагогтарға біліктілік санатын автоматты түрде беру жөнінде ұсыныс айтылды. Министр ұсынысты қолдамайтынын жеткізді.
Оның пікірінше, мұғалімнің санаты дипломға емес, кәсіби деңгейі мен сабақ беру сапасына қарай анықталуы қажет.
«Қазір мұғалімдердің авторлық бағдарламалар әзірлеу мүмкіндігі де қызу талқыланып жатыр. Сондай-ақ президент Тоқаевтың тапсырмасымен «Педагог мәртебесі туралы» заңға мұғалімдерді қолдауға бағытталған бірқатар өзгеріс енгізіледі», – деді Сүлейменова.
Министрлік аттестаттаумен қатар, шағын жинақты мектептерді қолдау бойынша жаңа шараларды қолға алмақ. Әсіресе ауылдық жердегі білім сапасын көтеріп, педагогтарды тартуға ерекше назар аударылып отыр. Бүгінде білім беру саласында 600 мыңға жуық мұғалім жұмыс істейді, ал сала мамандарынан ұсыныстар әлі де түсуде.
Осыған дейін Қазақстан мектептерінде бірнеше пәнді біріктіру бастамасы көтерілген еді. Жаңа жоба бойынша алгебра мен геометрия пәндері «Математикаға», химия, физика және биология пәндері «Жаратылыстануға», ал дүниежүзілік тарих пен құқық негіздері «Әлеуметтік ғылымдар» бағытына біріктірілмек.
Тұшымды контентті Ertenmedia-ның телеграм арнасынан оқыңыз.
