Қырғызстан билігі мемлекеттік қызметкерлерге жылы маусымда жұмысқа пиджаксыз келу міндеттелді, деп жазады Ertenmedia.kz.
Қырғызстан министрлер кабинетінің төрағасы, президент әкімшілігінің басшысы Адылбек Қасымалиев мемлекеттік қызметкерлердің жаңа жұмыс формасына қатысты өкімге қол қойды. Құжатқа сәйкес, шенеуніктер енді жылы күндері костюм киіп отырмай, жұмысқа жейдемен келуі тиіс.
Қасымалиевтің айтуынша, мұндай шешім мемлекеттік мекемелерде кондиционерді аз қолдануға мүмкіндік береді. Ол күн райы тез өзгеретінін айтып, жаңбырлы күннен кейін ауа қайта жылынғанын еске салды. Сондықтан өкім алдағы күннен бастап толық енгізілуі қажет екенін жеткізді.
«Қазір біз костюммен жұмыс істеп, кондиционер қосамыз. Егер жай ғана жейде кисек, кондиционер қоспауға да болады. Біз электр энергиясын үнемдеуіміз керек», деді Адылбек Қасымалиев.
Қырғызстан билігі мұндай тәжірибенің Жапонияда қолданылатынын алға тартады. Онда жазғы уақытта ресми дресс-кодты жеңілдету арқылы мемлекеттік мекемелерде электр қуатын үнемдеу жолға қойылған. Қасымалиевтің сөзінше, Жапония осы тәсіл арқылы бюджет қаржысын айтарлықтай үнемдей алған.
Қырғызстанда соңғы бірнеше жылда электр энергиясының тапшылығы байқалып келеді. Ел билігі энергия тұтынуды азайтуға бағытталған түрлі шараны қарастырып жатыр. Соның бірі – мемлекеттік қызметкерлердің киім тәртібін жеңілдету арқылы ғимарат ішіндегі салқындату жүйесіне түсетін жүктемені азайту.
Энергетикалық тапшылық аясында Қырғызстан атом электр станциясын салу мүмкіндігін де талқылап жүр. Бұл мәселені референдумға шығару жоспарланған. Сондықтан пиджактан бас тарту сырттай қарағанда ұсақ шешім болып көрінгенімен, Бішкек үшін энергия үнемдеу саясатының бір бөлігі ретінде ұсынылып отыр.
Қырғызстандағы жаңа тәртіп мемлекеттік аппараттың күнделікті жұмыс мәдениетіне де өзгеріс әкелуі мүмкін. Ресми костюмнен уақытша бас тарту шенеуніктердің мәртебесін төмендетпейді. Керісінше, ресурсты үнемдеу, қарапайым шешім қабылдау және жағдайға бейімделу секілді практикалық басқару тәсілін көрсетеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
