Қазақстанда тексеру-өткізу жабдықтарын өндіру жобасы іске қосылуы мүмкін. ҚР Өнеркәсіп және құрылыс вице-министрі Олжас Сапарбеков Nuctech Kazakhstan компаниясының басшылығымен кездесу өткізді. Жиынға Қазақстан Республикасы Президенті Әкімшілігі Басшысының орынбасары Әсел Жанасова да қатысты, деп жазады Ertenmedia.kz.
Кездесуде Қазақстанда импортты алмастыру және электронды өнеркәсіпті дамыту бағдарламасы аясында Nuctech компаниясының тексеру-өткізу жабдықтарын ел аумағында өндіру мәселесі талқыланды. Nuctech әлемдік нарықта қауіпсіздік және бақылау жүйелері бойынша жетекші компаниялардың бірі саналады.
Жоба Мемлекет басшысының көлік-логистика саласын дамыту, транзиттік әлеуетті арттыру, инфрақұрылымды жаңғырту және Қазақстанның Еуразия кеңістігіндегі бәсекеге қабілетті хаб ретіндегі позициясын күшейту жөніндегі тапсырмалары аясында қолға алынып отыр.
Өндіріс қуаттарын іске қосу 2026 жылдың соңына жоспарланған. Кәсіпорын Алматы қаласындағы «Инновациялық технологиялар паркі» арнайы экономикалық аймағында ашылады.
Жоба аясында қауіпсіздікті қамтамасыз етуге арналған заманауи жүйелер шығару көзделген. Олардың қатарында Kylin Ti және XT2100 инновациялық тексеру кешендері, сондай-ақ жүк пен багажды тексеруге арналған екі проекциялық CX180180D және CX100100D рентген-телевизиялық қондырғылары бар.
Сонымен қатар сервистік орталықтар желісі мен қосалқы бөлшектер қоймасын құру жоспарланып отыр. Мұндай инфрақұрылым Қазақстан аумағындағы жабдықтардың үздіксіз жұмыс істеуіне және оларды дер кезінде жөндеп, техникалық қызмет көрсетуге мүмкіндік береді.
Мамандардың пікірінше, жоба Қазақстандағы электронды өнеркәсіптің дамуына серпін береді. Сонымен бірге жаңа жұмыс орындарын ашуға, отандық мамандардың біліктілігін арттыруға және шетелдік жеткізілімдерге тәуелділікті азайтуға жағдай жасайды.
Отандық өндірістің іске қосылуы елді заманауи тексеру жабдықтарымен қамтамасыз етуге жол ашады. Мұндай жүйелер түзеу мекемелерінде, теміржол вокзалдарында, әуежайларда, мемлекеттік мекемелерде және стратегиялық нысандарда қолданылады.
Қазақстан үшін бұл жоба тек жаңа өндіріс ашу ғана емес, қауіпсіздік инфрақұрылымын технологиялық тұрғыдан жаңартуға бағытталған қадам. Егер жабдық ел ішінде шығарылып, сервистік қызмет те Қазақстанда көрсетілсе, бақылау жүйелерінің тұрақтылығы артып, импортқа тәуелділік біртіндеп төмендейді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
