Қазақстан теңгесі 2026 жылдың басынан бері Еуропа мен Азиядағы долларға қатысты ең көп нығайған валюта атанды. Ұлттық валютаның өсуіне қазақстандық мемлекеттік облигацияларға шетелдік инвесторлар тарапынан сұраныстың күрт артуы ықпал еткен, деп хабарлайды Ertenmedia.kz Financial Times-қа сілтеме жасап.
Басылымның есебінше, жыл басынан бері теңге АҚШ долларына қатысты 9,7 пайызға нығайды. Бұл көрсеткіш бойынша Қазақстан валютасын тек Латын Америкасы мен Африканың санаулы елдері ғана басып озған.
Шетелдіктердің теңгемен шығарылған мемлекеттік облигацияларға салған қаражаты бір жыл ішінде екі еседен астам өсті. 2025 жылдың маусымында олардың портфелі шамамен 2 млрд доллар болса, биыл маусымда 5 млрд долларға жеткен. Қазір халықаралық инвесторлардың үлесіне Қазақстанның ішкі мемлекеттік қарызының оннан бір бөлігіне жуығы тиесілі.
Инвесторларды, ең алдымен, Қазақстандағы жоғары пайыздық мөлшерлеме қызықтырып отыр. Шілдеде базалық мөлшерлеме 16,75 пайызға дейін төмендетілгенімен, ол инфляция деңгейінен әлі де едәуір жоғары. Мұндай айырмашылық шетелдік қорларға теңгедегі активтерден жоғары кіріс табуға мүмкіндік береді.
«Бұл мықты іргелі тарих. Инвесторлар өз портфельдерін әртараптандырғысы келеді», — деді LGT Capital Partners компаниясының дамушы нарықтардағы облигациялар бөлімінің басшысы Йетро Сиеккинен.
Сарапшылар теңгенің қазіргі нығаюын мұнай бағасымен ғана байланыстырмайды. ING экономисі Дмитрий Долгиннің айтуынша, биылғы өсімге сауда ағындарынан гөрі Қазақстанға кірген шетелдік капитал көбірек әсер еткен.
Сұраныстың артуына мемлекеттік бағалы қағаздар нарығын шетелдіктер үшін ашу жоспары да серпін берді. Қазақстан ішкі облигацияларды Euroclear халықаралық есеп айырысу жүйесіне қосуды және кейін JPMorgan-ның GBI-EM индексіне кіруді көздеп отыр. Бұл қадамдар қазақстандық қағаздарды сатып алу мен сатуды жеңілдетуі мүмкін.
Инвесторлар мұнай экспортына төнген қауіпке қарамастан Қазақстан активтеріне қаржы салуын жалғастырған. Шілдедегі дрон шабуылдарынан кейін Қара теңіздегі Каспий құбыр консорциумы терминалының жұмысы бұзылып, мұнай тиеу көлемі 20 пайыздан астам төмендеген. Аталған бағыт Қазақстан мұнай экспортының басым бөлігін тасымалдайды. Reuters мәліметінше, соның салдарынан елдегі мұнай өндірісі де қысқарған.
Соған қарамастан, инвестициялық деңгейдегі кредиттік рейтинг, жоғары мөлшерлеме және облигациялар нарығының біртіндеп ашылуы Қазақстанды халықаралық капитал үшін тартымды бағытқа айналдырып отыр. Алайда теңгенің алдағы бағамы шетелдік капитал ағынына, мұнай экспортының тұрақтылығына және Ұлттық банктің ақша-кредит саясатына тәуелді болмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
