Қазіргі қала өмірінде таза ауамен тыныстау барған сайын күрделеніп келеді. Тұрғын үйлердегі жиһаздан бөлінетін химиялық заттар, пластмасса бұйымдар мен көшеден кіретін түтін денсаулыққа салмақ салады. Мұндай жағдайда пәтердегі микроклиматты жақсартудың қарапайым әрі тиімді жолы – пайдалы бөлме өсімдіктерін өсіру. Кейбір жасыл желектер жай ғана әдемілік үшін емес, емдік қасиетімен де ерекшеленеді, деп хабарлайды Ertenmedia.kz.
Эвкалипт – тыныс алу жолдарына таптырмас көмек
Тыныс алу жолдары жиі қабынатын немесе өкпе дертіне шалдыққан адамдар үшін бөлмеде эвкалипт ағашын ұстау өте пайдалы. Бұл өсімдіктің жапырақтарынан бөлінетін эфир майлары мен белсенді қосылыстар тыныс алуды жеңілдетіп, қақырықтың бөлінуіне септігін тигізеді.
Эвкалипт ауаға табиғи фитонцидтер таратады. Олар кеңірдек бұлшықеттерін босаңсытып, спазмды басады. Осы қасиетіне байланысты дәрігерлер демікпеден (астма) немесе созылмалы бронхиттен зардап шегетін жандарға жатын бөлмеге кішігірім эвкалипт бұтасын қоюды ұсынады. Ол ауадағы микробтардың таралуын тежеп, үйдегі атмосфераны табиғи түрде дезинфекциялайды.
Пеларгония – тыныш ұйқы мен сау жүйке жүйесі
Көпшілікке қазтамақ (герань) деген атпен таныс пеларгония гүлі жүйке жүйесін реттеуге көмектеседі. Өсімдік құрамындағы пайдалы компоненттер адамның эмоционалды жай-күйін орнықтыруға, күйзеліс пен мазасыздықты сейілтуге ықпал етеді.
Ұйқысыздыққа бейім адамдар пеларгонияны терезе алдына немесе төсек маңына қойса, түнгі тынығу сапасы айтарлықтай жақсара түседі. Сонымен қатар бұл гүлдің хош иісі кеңірдек тамырларының түйілуін бәсеңдетіп, бас сақинасы мен қысымнан болатын бас ауруларын жеңілдетуге қауқарлы.
Хлорофитум – қалалықтарға арналған табиғи сүзгі
Ауасы лас мегаполис тұрғындары үшін хлорофитум таптырмас жасыл көмекші саналады. Бұл өсімдікті ғалымдар мен зерттеушілер «табиғи шаңсорғыш» немесе тірі сүзгі деп атайды.
Күтімі өте қарапайым, суды көп талғамайтын бұл гүл бірнеше сағаттың ішінде бөлмедегі ауаны зиянды қоспалардан 80 пайызға дейін тазартып, оттегі деңгейін арттыра алады.
Хлорофитум заманауи пәтерлерде жиі кездесетін қауіпті улы қосылыстарды, әсіресе пластиктен, сапасыз жиһаздан бөлінетін формальдегид пен бензолды қарқынды сіңіреді. Сондай-ақ темекі түтіні мен улы газдардың қалдығын жылдам залалсыздандырады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
