Америкалық венчурлік инвестор, Sofreh Capital қорының негізін қалаушы әрі бас директоры Шервин Пишевар Қазақстанда компания кеңселерін ашып, қызметкерлерінің бір бөлігін көшіруді және елдің жасанды интеллект саласына тікелей қаржы салуды жоспарлап отыр, деп хабарлайды Ertenmedia.kz.
Инвестор өз бастамасын Астанада өткен «AI & Digital Bridge 2026» халықаралық форумы аясындағы «THE NEW ECONOMY: POWERED BY AI» панельдік сессиясында жария етті. Оның айтуынша, еліміздің инновациялық белсенділігі мен ресурстық әлеуеті жаңа цифрлық экономиканы жедел қарқынмен құруға толық жағдай жасайды.
Қазақстанның негізгі артықшылықтары мен Кремний алқабының үлгісі
Шервин Пишевар елімізде мықты инженерлік база, білімді кадрлар мен жаңа бастамаларды қолдайтын мемлекеттік саясат қалыптасқанына ерекше назар аударды. Сондай-ақ қазақстандық мамандардың Higgsfield AI сынды табысты жобаларын бүкіл әлемге үлгі ретінде атап өтті.
«Сіздерде таланттар, инженер кадрлар, инновацияларды қолдайтын мемлекет және ЖИ-экономикасын өркендетуге қажетті барлық ресурстар бар. Ғарыш өнеркәсібіне керек пайдалы қазбалар, спутниктер, атом инфрақұрылымы мен Higgsfield сияқты мысалдар жеткілікті. Сол себепті мұнда кеңселер ашып, командамды көшіруді және Қазақстанның болашағына инвестиция құюды қалаймын», – деді Шервин Пишевар.
Инвестор технологиялық экожүйені қалыптастыру үдерісін Кремний алқабының тәжірибесімен байланыстырды. Оның пікірінше, аталған орталықтың уақыт өте келе негізгі күші материалдық ресурстардан гөрі жинақталған терең білім мен кәсіби құзыреттерге ұласты, ал бұл бағытта Қазақстанның мүмкіндігі зор.
ЖИ-экономикасының бес деңгейі және есептеу қуатының экспорты
Шетелдік инвестордың шешімі елдегі озық инфрақұрылымды дамыту жөніндегі бастамалармен тұспа-тұс келіп отыр. Панельдік сессияда жасанды интеллект және цифрлық даму министрі Жаслан Мәдиев Қазақстан ЖИ-экономикасының бес деңгейін де кешенді дамытуға ниетті екенін мәлімдеді. Бұл құрылым энергетикалық база мен микрочиптерден бастап, отандық тілдік модельдер мен нақты қолданбалы өнімдерді толық қамтиды.
Сонымен қатар «Қазақтелеком» басшысы Бағдат Мусин алдағы жылдан бастап еліміз сыртқы нарыққа есептеу қуатын экспорттауды жоспарлап отырғанын жеткізді. Sofreh Capital қорының кеңселері нақты қашан ашылатыны және жобаға тартылатын қаражаттың жалпы сомасы алдағы кезеңде жарияланбақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
