Қазақстандықтар 2025 жылға есептелген мүлік салығын 2026 жылғы 1 қазанға дейін төлеуі керек. Белгіленген мерзімді өткізіп алған азаматтардың берешегі кейін мәжбүрлі түрде өндіріліп алынуы мүмкін, – деп жазады Ertenmedia.kz.
Мемлекеттік кірістер комитетінің мәліметінше, салық жылжымайтын мүлік пен жер учаскелеріне иелік ететін жеке тұлғаларға есептелген. Төленуге тиіс сомалар туралы ақпарат екінші деңгейдегі банктерге жіберілді. Соның негізінде банк клиенттеріне әр нысан бойынша толық мәлімет көрсетілген хабарламалар келе бастады.
Берешек туралы ақпаратты Kaspi және Halyk мобильді қосымшаларынан да көруге болады. PUSH-хабарламада азаматтың атына тіркелген әрбір нысан мен сол бойынша есептелген салық сомасы жеке көрсетіледі. Салық төлеуші деректерді тексеріп, төлемді қосымша арқылы бірден жүргізе алады.
Мүлік салығын екінші деңгейдегі банктердің мобильді қосымшалары арқылы төлеуге мүмкіндік бар. Азаматтар банк бөлімшелеріне немесе төлем терминалдарына қолма-қол ақша өткізе алады. Банкомат пен терминал арқылы банк картасымен төлеу тәсілі де қолжетімді.
Төлемді кейінге қалдырған меншік иелеріне қатысты шара 2 қазаннан бастап қолға алынады. Осы күннен бастап берешегі өтелмеген азаматтарға салық міндеттемесі туралы хабарлама жіберіледі. Құжатта қарыз сомасы мен оны өтеу тәртібі көрсетіледі.
Хабарлама берілгеннен кейін салықты төлеуге 30 жұмыс күні беріледі. Осы мерзім ішінде ақша түспесе, мемлекеттік кірістер органы салық бұйрығын қалыптастырады. Оны орындауға тағы 5 жұмыс күні қарастырылған.
Салық бұйрығы белгіленген уақытта орындалмаса, іс жеке сот орындаушысына беріледі. Мұндай жағдайда негізгі қарызға қоса атқарушылық іс жүргізуге байланысты қосымша шығын туындауы ықтимал. Берешекті мәжбүрлеп өндіріп алу борышкердің шоттары мен мүлкіне қатысты шектеулерге де әкелуі мүмкін.
Мемлекеттік кірістер комитеті азаматтарды төлемді соңғы күнге қалдырмауға шақырды. Мобильді қосымшадағы нысандар мен есептелген сомаларды алдын ала тексерген жөн. Уақытылы төленген салық хабарлама, салық бұйрығы және сот орындаушысына жолдау рәсімінен сақтайды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
