Қазақстандағы жергілікті әкімшілік полиция бөлімшелеріне 20 мыңнан астам қызметкер жетіспейді. Соның кемінде 10 мыңы патрульдік полицияға қажет, – деп жазады Ertenmedia.kz.
Кадр тапшылығы туралы ішкі істер министрінің орынбасары Игорь Лепеха Үкіметтегі брифингте айтты. Оның сөзінше, мәселе тек көшеде қызмет атқаратын патрульдерге қатысты емес. Учаскелік инспекторлар мен кәмелетке толмағандар ісі жөніндегі инспекторлар да жеткіліксіз.
Патрульдік полиция қоғамдық тәртіпті сақтаумен қатар жол қауіпсіздігіне жауап береді. Қызметкерлер қала көшелерімен бірге қала сыртындағы тасжолдарды да бақылауы керек. Міндет көбейгенімен, штат саны нақты қажеттілікті өтей алмай отыр.
«Патрульдік полицияға кемінде тағы 10 мың адам қажет. Өйткені олар қоғамдық тәртіпті қорғаумен, жол қауіпсіздігімен және қала сыртындағы трассаларды бақылаумен айналысады», – деді Игорь Лепеха.
Жалпы тапшылық 10 мыңдық көрсеткіштен екі есе көп. ІІМ есебінше, жергілікті полиция бөлімшелеріне 20 мыңнан астам қосымша қызметкер қажет. Бұл санға патрульдер, учаскелік қызметкерлер және балалармен жұмыс істейтін инспекторлар кіреді.
Қажеттілік қалалар мен елді мекендердің кеңеюіне байланысты артып келеді. Жаңа шағын аудандар, мектептер, учаскелік полиция пункттері және тұтас елді мекендер ашылып жатыр. Алайда қауіпсіздікке жауапты қызметкерлердің саны осы өзгеріске ілесе алмай отыр.
Аталған санаттағы полиция қызметкерлері жергілікті бюджет есебінен қаржыландырылады. Сол себепті ІІМ әкімдіктермен бірге штат санын кезең-кезеңімен ұлғайту мәселесін талқылап жатыр. Негізгі басымдық халықпен тікелей жұмыс істейтін бөлімшелерге берілмек.
«Бюджеттің ең төменгі мүмкіндіктері аясында әкімдермен бірге осы бөлімшелердің санын кезең-кезеңімен көбейту бағытында жұмыс істеп жатырмыз. Президент Әкімшілігі мақұлдап, Үкімет қолдау көрсетсе, келесі жылдан бастап олардың штатын біртіндеп арттырамыз деп үміттенеміз», – деді министрдің орынбасары.
Игорь Лепеха полиция жұмысындағы кейбір кемшілік кадр тапшылығымен байланысты болуы мүмкін екенін де жоққа шығармады. Қызметкер азайған сайын бір инспекторға түсетін аумақ пен міндет көбейеді. Мұндай жүктеме құқық бұзушылықтың алдын алу мен тұрғындардың өтінішіне жедел әрекет ету сапасына әсер етеді.
ІІМ жоспары қолдау тапса, полиция штатын көбейту 2027 жылдан басталуы мүмкін. Алайда нақты қанша қызметкер қабылданатыны бюджет мүмкіндігі мен мемлекеттік органдардың шешіміне байланысты. Әзірге 20 мыңнан астам маманға қажеттілік полиция жүйесіндегі ең өткір кадр мәселесінің біріне айналып отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
