Жаңа iPhone сатып алу отбасылық бюджетке жүздеген мың теңге салмақ салуы мүмкін. Қазіргі смартфон негізгі міндеттерді әлі де дұрыс атқарып тұрса, бірнеше қарапайым әрекет арқылы оның қызмет мерзімін ұзартуға болады, – деп жазады Ertenmedia.kz.
Алдымен аккумулятордың жағдайын тексерген жөн. Телефонды күніне бірнеше рет қуаттауға тура келсе немесе заряд пайызы жылдам төмендесе, мәселе батареяның тозуынан болуы ықтимал. Қажетті ақпарат «Баптаулар» бөліміндегі «Аккумулятор» және «Аккумулятор күйі» мәзірінде көрсетіледі.
Максималды сыйымдылық 80 пайызға жақындаса немесе одан төмендесе, аккумулятор ауыстыру мәселесін қарастырған дұрыс. Apple мәліметінше, iPhone 14 және одан бұрынғы модельдердің батареясы қалыпты жағдайда 500 толық қуаттау циклінен кейін бастапқы сыйымдылықтың 80 пайызын сақтауға есептелген. iPhone 15 үлгілерінде осы көрсеткіш 1000 циклге дейін ұлғайтылған.
Жаңа батарея смартфонның бір қуатта жұмыс істеу уақытын ұзартып, өнімділіктің төмендеуін азайта алады. Жөндеу бағасы модель мен сервис орталығына байланысты өзгереді. Құрылғыны белгісіз бөлшекпен жөндетпес бұрын бірнеше орталықтың бағасы мен кепілдік шартын салыстырған жөн.
Телефонның баяулауына жадының толып қалуы да әсер етеді. «Баптаулар», «Негізгі» және «iPhone қоймасы» бөлімі арқылы орынды не алып тұрғанын көруге болады. Көбіне жадты қажетсіз фото, ұзақ видео, мессенджер файлдары мен көптен ашылмаған қосымшалар толтырады.
Алдымен керексіз файлдарды өшіріп, көлемді материалдарды компьютерге немесе бұлт қоймасына көшірген дұрыс. Қарапайым тазалау нәтиже бермесе, смартфонды зауыттық күйге қайтаруға болады. Толық өшіру алдында фото, байланыс нөмірлері мен маңызды құжаттардың резервтік көшірмесін міндетті түрде сақтау қажет.
iPhone баяуласа жаңасын алуға асықпаған жөн
Кейде жаңа телефон алуға техникалық ақау емес, үйреншікті көріністен жалығу себеп болады. Мұндайда басқа түстегі қап, жаңа қорғаныш әйнек және жұмыс үстелінің жаңартылған безендірілуі жеткілікті. Аз шығынмен смартфонға жаңа кейіп беруге болады.
Экран, камера, қуаттау ұясы немесе басқа маңызды бөлшектер қатар істен шықса, жөндеу құнын есептеген жөн. Батарея ауыстырылғаннан кейін де құрылғы тез отырып, жады тұрақты түрде жетпесе, жаңа модельге көшу тиімді болуы мүмкін. Алайда iPhone қажетті жаңартуларды алып, күнделікті жұмысты атқарып тұрса, оны ауыстыруға асығудың қажеті жоқ.
Жаңа құрылғы қажет болса, Trade-in бағдарламасын қарастыруға болады. Дүкен ескі iPhone-ды бағалап, сол соманы жаңа телефон құнынан шегереді. Мысалы, смартфон 200 мың теңгеге бағаланса, сатып алушы қалған айырмасын төлейді.
Бағалау кезінде модель, шығарылған жылы, корпус пен экранның күйі, батарея және негізгі функциялардың жұмысы ескеріледі. Алдын ала ұсынылған баға тексерістен кейін өзгеруі ықтимал. Apple шарттарында да құрылғының нақты жағдайы сипаттамаға сәйкес келмесе, бастапқы бағалау қайта қаралатыны көрсетілген.
Trade-in алдында бірнеше дүкеннің ұсынысын салыстырған дұрыс. Смартфонды өз бетіңізше сату көбірек ақша әкелуі мүмкін, бірақ сатып алушы іздеуге уақыт қажет. Қай жол таңдалса да, құрылғыдағы деректерді көшіріп, Apple аккаунтынан шығып, жеке ақпаратты толық өшіру керек.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
