Танымал продюсер әрі медиаменеджер Арман Давлетяров әлеуметтік желіде өзін «қазақ тілін білмейді» деп кінәлаған оқырмандарына арнайы бейнеүндеу жариялап, сынға жауап берді, деп хабарлайды Ertenmedia.kz.
Көп жыл бойы медиа саласында еңбек етіп, кейінгі жылдары түрлі қоғамдық жобаларға белсенді араласып жүрген медиаменеджердің мекенжайына мемлекеттік тілге қатысты пікірлер жиі жазылатын. Алматыға сапары барысында достарымен дастарқан басында шай ішіп отырған продюсер осы сауалдарды жауапсыз қалдырмауды жөн көрген.
Дастарқан басындағы әңгіме
Арман Давлетяров парақшасында жарияланған бейнежазбада ана тілінде еркін сөйлеп, өзіне қатысты пікір білдіргендерге байыппен жауап қатты. Ол желі қолданушыларының арасында қалыптасқан жаңсақ түсінікті сейілтіп, қазақ тілінде сөйлесуден ерекше рухани ләззат алатынын жеткізді.
«Бүкіл қазақ халқына сәлем! Қазақ тілінде шай ішіп, рақаттанып сөйлеп отырмын. Иә, сақалым ағарды, сәл қартайдым. Мына бейнежазба маған үнемі «Сіз қазақша сөйлемейсіз» деп жазатындарға арналады. Мен қазақша сөйлеймін. Әрі зор ықыласпен, қуана сөйлеймін!», – деді ол.
Қоғам назарындағы тұлға
Арман Давлетяров ұзақ уақыт бойы «Муз-ТВ» арнасының бас директоры қызметін атқарып, халықаралық ауқымдағы музыкалық жобалардың басы-қасында болған. Мәдениет пен өнер саласын дамытуға қосқан үлесі үшін Қазақстанның еңбек сіңірген қайраткері атағына ие болған.
Кейінгі кездері ол отбасылық құндылықтар мен жастар тәрбиесіне арналған кездесулер өткізіп, сұхбаттарында ұлттық дәстүр мен тәрбиені жиі тілге тиек етіп келеді. Оның бұл жолғы бейнежазбасы да желіде қызу талқыланып, жанкүйерлері тарапынан оң пікірлерге ие болды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
