АҚШ Әділет министрлігі Вирджиния штатының ықпалды сенаторы, Демократиялық партияның өкілі Луиз Лукасқа заңсыз каннабис бизнесін басқарды және сыбайлас жемқорлыққа жол берді деген айып тақты, деп хабарлайды Ertenmedia.kz.
Федералдық прокурорлар 82 жастағы заң шығарушы өз отбасы мүшелерімен бірге заңсыз есірткі желісін құрған деп есептейді. Ресми мәліметке сәйкес, сенатор бейсенбі күні таңертең билік өкілдеріне өз еркімен берілді. Бұл іс бойынша оның екі қызы, немересі және тағы үш серіктесі де күдікке ілініп, тұтқындалды.
Тағылған айыптар мен тергеу деректері
Таратылған айыптау актісіне сәйкес, Луиз Лукасқа бопсалау, ақшаның ізін жасыру, тарату мақсатында ірі көлемде каннабис сақтау және қызметтік өкілеттігін жеке басының мүддесіне пайдалану секілді бес бірдей ауыр бап бойынша кінә артылып отыр.
Тергеу деректері сенатордың «Lucas Enterprise» деп аталатын ұйымдасқан топты басқарғанын алға тартады. Аталған топ кемінде 100 келі каннабис өнімдерін заңсыз айналымға шығарып, түскен қаражатты жылыстатқан. Сонымен қатар топтың 5 миллион долларға жуық заңсыз табыс тапқаны айтылады.
АҚШ-тың бас прокуроры Тодд Бланш арнайы баспасөз мәслихатында бұл істің бірнеше жылдан бері жан-жақты тексерілгенін хабарлады.
«Айыптау қорытындысында көрсетілген деректер халыққа қызмет етуге сайланған лауазымды тұлғаның жеке қаржылық пайдасын сайлаушыларының мүддесінен жоғары қойғанын көрсетеді», – деді Тодд Бланш.
Саясаткердің ықпалы және қорғаушы тараптың ұстанымы
Луиз Лукас — Вирджиния штатындағы ең беделді демократтардың бірі. Ол 1992 жылдан бері штатта сенатор қызметін атқарып келеді. Қазіргі таңда Сенаттың қаржы комитетін басқарады. Бұл қызмет штат бюджетіне қатысты барлық заң жобаларын тікелей бақылауға мүмкіндік береді.
Осы жылдың мамыр айында Федералдық тергеу бюросының қызметкерлері Лукастың Портсмут қаласындағы жұмыс кеңсесі мен ол үлескер болып табылатын «The Cannabis Outlet» дүкеніне тінту жүргізген болатын. Вирджинияда каннабисті жеке қолдануға рұқсат берілгенімен, оны рекреациялық мақсатта бөлшек саудада сатуға әлі ресми түрде рұқсат берілмеген.
Сенатор өзіне тағылған айыптарды саяси қысым деп санайтынын ашық білдірді. Ол өзінің әлеуметтік желідегі парақшасында билікке қарсы күресті жалғастыратынын жеткізді.
«Федералдық үкіметтің барлық тетігі мен қысымы 82 жастағы әжеге қарсы бағытталып отыр. Мен өмір бойы әділдік үшін күресіп келдім, енді де қорқып кері шегінбеймін», – деп мәлімдеді Луиз Лукас.
Айыптау қорытындысы АҚШ конгресіне өтетін аралық сайлауға екі аптадан аз уақыт қалғанда жарияланды. Дегенмен ресми органдар бұл тергеудің сайлау науқанына ешқандай қатысы жоқтығын алға тартып отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
