Алматыдағы «Жетісу-2» жастар комьюнити-орталығының эко-хабында «Қалдықты сұрыпта – табиғатты сақта!» атты экологиялық акция өтті. «Таза Қазақстан» жалпыұлттық бастамасы аясында ұйымдастырылған шараға жастар мен Жетісу ауданының тұрғындары қатысты, – деп жазады Ertenmedia.kz.
Акцияның негізгі мақсаты тұрғындарға қалдықтарды бөлек жинау тәртібін түсіндіру, қайта өңдеуге жарамды материалдардың көлемін арттыру және табиғатқа жауапкершілікпен қарау мәдениетін қалыптастыру болды.
Қатысушылар үйлерінен алып келген тұрмыстық қалдықтарды арнайы контейнерлерге бөліп салды. Пластик, алюминий, қағаз және басқа да қайта өңделетін материалдар сұрыпталып, бір бөлігі фандоматқа өткізілді.
Комьюнити-орталық қызметкерлері қалдықты бөлек жинаудың қарапайым тәртібін көрсетті. Сонымен қатар қайта өңдеу табиғи ресурстарды үнемдеуге, полигонға жөнелтілетін қоқысты азайтуға және қаладағы экологиялық ахуалды жақсартуға көмектесетіні түсіндірілді.
Сұрыптау күнделікті дағдыға айналуы тиіс
Экологиялық мәдениетті дамыту Президент Қасым-Жомарт Тоқаевтың тапсырмасымен жүзеге асырылып жатқан «Таза Қазақстан» бастамасының негізгі бағыттарының біріне жатады. Тазалыққа ұқыпты қарау бір реттік сенбілікпен немесе мерекелік акциямен шектелмей, әр адамның күнделікті әдетіне айналуға тиіс.
Алматыда осы бағыттағы жұмыстар жастардың қатысуымен жүйелі жүргізіліп келеді. Экологиялық акциялармен қатар түсіндіру кездесулері, тазалық шаралары және қалдықтарды бөлек жинауға үйрететін тәжірибелік сабақтар ұйымдастырылуда.
Қала әкімі Дархан Сатыбалды мегаполисті абаттандыруға, экологиялық инфрақұрылымды жетілдіруге және жайлы қалалық орта қалыптастыруға бағытталған бастамаларды қолдауға көңіл бөліп келеді. Жастар комьюнити-орталықтарының жанынан ашылған эко-хабтар осы жұмыстың нақты тетігі саналады.
«Жетісу-2» комьюнити-орталығындағы эко-хаб 2026 жылғы 10 қыркүйекте ашылды. Ол Алматыдағы осындай үшінші экологиялық кеңістікке айналып, аудан тұрғындарына сұрыпталған қалдықтарды тұрақты тапсыруға мүмкіндік берді.
Эко-хаб аудан тұрғындары үшін ашық
Эко-хаб аумағында қалдықтың әр түріне арналған 10 арнайы контейнер орнатылған. Тұрғындар мұнда пластик бөтелке, алюминий құты, қағаз және қайта өңдеуге жарамды өзге де материалдарды әкеліп тапсыра алады.
Орталық жетекшісі Айбек Берікболұлының айтуынша, басты міндет қалдықтарды сұрыптауды тұрғындардың қалыпты өмір салтына енгізу. Жастар акцияға қатысумен шектелмей, табиғатты қорғаудың маңызын түсініп, алған білімін үйінде және айналасында қолдануы қажет.
«Эко-хаб ауданның барлық тұрғыны үшін ашық. Мұнда экологиялық білімді тәжірибе жүзінде қолдануға мүмкіндік бар. Қалдықтарды дұрыс сұрыптау арқылы әр адам қоршаған ортаны қорғауға нақты үлес қоса алады», – деді ол.
Бұған дейін Алматыда жастардың экологиялық мәдениетін арттыруға арналған 110-нан астам іс-шара өткізілді. Оған 15 мыңнан аса адам қатысып, қаланың тазалығы мен табиғи ортасын сақтауға атсалысты.
Алдағы уақытта эко-хабта жаңа экологиялық акциялар, танымдық кездесулер мен тәжірибелік сабақтар жалғасады. Ұйымдастырушылар мұндай алаңдар тұрғындардың қалдыққа деген көзқарасын өзгертіп, сұрыптауды күнделікті өмірдің қарапайым әрі пайдалы дағдысына айналдырады деп күтеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
