Бейрутте тауық етінен жасалған сэндвичтің қымбат бағасы қоғамда үлкен пікірталас тудырып, елдегі терең әлеуметтік жіктелісті айқын көрсетті, деп хабарлайды Ertenmedia.kz.
Салауатты тамақтану бағытындағы The Glow Paradise мейрамханасы дәстүрлі шиш таук тағамының диеталық нұсқасын шығарып, оны «Chic Taouk» деп атады. Жаңа тағамның бағасы шамамен 13 доллар болып белгіленді. Бұл көрсеткіш Бейруттегі қарапайым тауық сэндвичтерінің нарықтағы орташа құнынан екі есеге жуық қымбат.
Әлеуметтік желі қолданушылары халықтың басым бөлігі қарапайым азық-түлікке ақша таппай отырған шақта мекемені негізсіз баға өсірді деп айыптады. Дегенмен наразылыққа қарамастан, сұраныс азаймаған. Мекеменің басқарушы серіктесі Граг Джегхалян бар болғаны 11 күн ішінде 20 мыңнан астам сэндвич сатылғанын айтып, желідегі қызу дауды табиғи маркетингке балады.
Орта таптың жойылуы мен жабылып жатқан мекемелер
Қоғам бір сэндвичтің құнын қызу талқылап жатқанымен, сарапшылар мұның артында үлкен қайшылық барын айтады. Сент-Джозеф университетінің экономисі Сами Надер мейрамханадағы толассыз келушілер елдегі шынайы ахуалды бүркемелей алмайтынын жеткізді.
«Сіз мейрамханаға лық толы адамдарды көресіз, бірақ өткен айда ғана 22 мекеменің жабылғанын байқамайсыз», – деді экономист Сами Надер.
Экономистің айтуынша, 2019 жылғы қаржылық күйреу, 2020 жылғы Бейрут портындағы жарылыс және екі жыл ішіндегі екі бірдей соғыс Ливандағы орта тапты толық дерлік жойып жіберді. Оған қоса оңтүстік өңірдегі әскери қақтығыстар жағдайында халықтың назары осындай тұрмыстық тақырыптарға ауып жатқаны да алаңдаушылық туғызады.
Экономикалық құлдырау және халықтың сатып алу қабілеті
Ливан экономикасы элитаның жемқорлығы мен шамадан тыс шығындары салдарынан терең тоқырауға ұшырады. 2019 жылдан бері елдің жалпы ішкі өнімі шамамен 40 пайызға төмендеді.
Дүниежүзілік банктің мәліметінше, жаһандық энергетика мен логистика бағасының өсуіне байланысты елдегі инфляция 17,5 пайызға дейін жетеді деп күтілуде. Бұл Халықаралық валюта қоры тіркеген әлемдік инфляция деңгейінен төрт еседен астам жоғары. БҰҰ Балалар қорының (ЮНИСЕФ) баяндамасына сәйкес, Ливандағы әрбір бес отбасының төртеуі күнделікті бірінші қажеттілік тауарларын сатып алуға қиналады.
Қымбаттаған электр қуаты және төмен жалақы
Елде мемлекеттік электр желісінің жұмысы тоқтап қалғандықтан, тұрғындар жеке генераторларға тәуелді. Энергетика министрлігі белгілеген тарифтерге сәйкес, тамыз айында генератор төлемдері бірден 20 пайызға өсті. Ақпан айымен салыстырғанда бұл шығын 60 пайызға жуық артқан.
Үйді тәулік бойы жарықпен қамтамасыз ету үшін айына жүздеген доллар төлеу қажет, ал елдегі ең төменгі жалақы небәрі 400 доллар көлемінде қалып отыр.
«Барлығы қымбаттап кетті, адамдардың шамасы жетпей жатыр. Енді жалақы аламыз да, күнкөріс үшін одан асыра қарызға кіреміз. Қазір бір топ шалқып өмір сүріп жатса, екінші топ шыдатпас жағдайдан өлместің күнін кешуде», – деді Хамра ауданындағы мейрамхана жұмысшысы Фуад Фахреддин.
Осылайша қарапайым тағамға айналған 13 долларлық сэндвич бүгінде байлық пен кедейліктің, сондай-ақ Ливандағы тереңдеп бара жатқан әлеуметтік қайшылықтың айнасына айналды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
