Бұрынғы Дүниежүзі көпенділер ойыны дирекциясының жетекшісі Наиль Нуров аса ірі көлемде пара алды деген күдікпен қамауға алынды, деп жазады Ertenmedia.kz.
Ашық деректерге қарағанда, сот Наиль Нуровты екі айға қамауға санкция берген. Қазір іс бойынша тергеу жүріп жатыр. Оған тағылған күдік 2024 жылы Астанада өткен V Дүниежүзілік көшпенділер ойындарына дайындық кезіндегі жобалардың бірімен байланысты айтылып отыр.
Тергеу нұсқасына сәйкес, әңгіме этноауыл салу жобасы төңірегінде өрбіген. Жобаның құны 500 млн теңгеден асқан. Құқық қорғау органдарының дерегінше, дирекция басшысы келісім жасалғаннан кейін мердігерден келісімшарт сомасының 10 пайызы көлемінде заңсыз сыйақы талап еткен болуы мүмкін.
Алдын ала мәлімет бойынша, Нуровқа қолма-қол ақша берілген. Сонымен қатар мердігер оның жеке пайдалануына арналған металл беседка орнату шығынын да төлеген деген дерек бар. Тергеу жалпы алынған заңсыз сыйақы кемінде 40 млн теңге болуы мүмкін деп есептеп отыр.
Наиль Нуров спорт менеджменті саласында бұрыннан белгілі тұлға саналады. Ол әр жылдары 2011 жылғы Азия ойындары, 2017 жылғы Алматы Универсиадасы секілді ірі халықаралық жобаларды ұйымдастыруға қатысқан. 2024 жылы Астанада өткен V Дүниежүзілік көшпенділер ойындарына дайындық дирекциясын да басқарған.
Айта кетейік, V Дүниежүзілік көшпенділер ойындары 2024 жылғы 8-13 қыркүйек аралығында Астанада өтті. Сол кезде Нуров ойындардың басталуын «сәтті өтті» деп бағалап, этноауылдың туристік және имидждік маңызын атап өткен еді. Этноауыл «Қазанат» ипподромы маңында орналасып, онда жарыстар, концерттер және өңірлердің этномәдени жобалары ұйымдастырылған.
Қазіргі іс дәл осы үлкен халықаралық шараға дайындық кезінде бөлінген қаражаттың жұмсалуына қатысты сұрақтарды алға шығарып отыр. Дүниежүзілік көшпенділер ойындары Қазақстан үшін тек спорттық жарыс қана болған жоқ. Ол елдің мәдени имиджін танытатын, туризмді ілгерілететін және ұлттық спортты халықаралық деңгейде көрсететін маңызды жоба ретінде ұсынылған.
Сондықтан мұндай іс қоғам назарын ерекше аударып отыр. Себебі ірі имидждік жобаларға бөлінетін қаржының ашық жұмсалуы мемлекеттік басқаруға деген сеніммен тікелей байланысты.
Сонымен бірге Наиль Нуровтың кінәсі сотта дәлелденген жоқ. Заң бойынша кез келген адамға қатысты айыптау үкімі заңды күшіне енгенге дейін ол кінәсіз деп саналады. Тергеу жалғасып жатыр, ал ресми органдар істің барлық мән-жайын кейін жария етуі мүмкін.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
