Қазақстанда халықаралық автотасымал саласына бақылауды күшейтетін жаңа өзгерістер жобасы талқылауға шығарылды, деп жазады Ertenmedia.kz.
ҚР Қаржы министрлігі мемлекеттік кірістер органдарының лауазымды тұлғалары Еуразиялық экономикалық одақтың кедендік шекарасындағы автомобиль өткізу пункттерінде көліктік бақылауды қалай жүргізетініне қатысты қағидаларға өзгеріс енгізуді ұсынды.
Жоба 2026 жылғы 2 шілдеге дейін қоғамдық талқылауда болады. Құжат «Ашық НҚА» порталында жарияланған. Азаматтар мен бизнес өкілдері осы уақытқа дейін өз ұсынысы мен ескертпесін қалдыра алады.
Министрліктің түсіндіруінше, өзгерістер халықаралық автомобиль тасымалдары кезінде рұқсат беру жүйесіне бақылауды кеңейтуге бағытталған. Әсіресе кедендік транзит рәсімі аяқталған соң тауар жеткізілетін орындардағы бақылау күшейтілмек.
Жаңа тәртіп халықаралық тасымалдағы заң бұзушылықтарды тиімді анықтауға мүмкіндік береді. Сонымен қатар инфрақұрылымы шектеулі өткізу бекеттерінде көліктің салмағы мен габаритіне қатысты құжаттық бақылау жүргізу тетігі нақтыланады.
Қаржы министрлігі мұндай қадам көлік саласындағы көлеңкелі схемаларды азайтып, халықаралық тасымалдың ашықтығын арттырады деп отыр. Өзгерістер сыртқы экономикалық қызметке қатысушылардың өтініштері ескеріле отырып әзірленген.
Жоба қабылданса, жаңартылған бақылау рәсімдерін енгізу шамамен алты ай ішінде алғашқы нәтиже беруі мүмкін. Осы кезеңде мемлекеттік кірістер органдарының жұмысы бейімделіп, ақпараттық жүйелер арасындағы байланыс реттеледі.
Сондай-ақ рұқсат талаптарын бұзу деректерін анықтау деңгейі артады деп күтіледі. Министрлік жаңа нормалар қосымша өтпелі кезеңсіз енгізілуі мүмкін екенін атап өтті.
Осылайша ұсынылып отырған өзгерістер халықаралық автотасымал нарығындағы тәртіпті күшейтуге, құжат айналымын нақтылауға және кедендік бақылаудың тиімділігін арттыруға бағытталып отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
