Әлеуметтік желіде Ириклин су қоймасынан үлкен көлемде су жіберіліп жатқаны туралы видео тарап кетті, — деп хабарлайды ErtenMedia.
stopfake.kz мәліметінше, Су ресурстары және ирригация министрлігі өкілі видеоға қатысты пікір білдірген.
«Бұл видеоның Ириклин су қоймасына қатысы жоқ. Бұл — 2024 жылғы көктемгі су тасқыны кезеңіндегі Сергеев су қоймасының (Солтүстік Қазақстан облысы) кадрлары. Бүгінгі таңда екі су қоймасы да штаттық режимде жұмыс істеп тұр.
2025 жылғы 11 ақпанда Ириклин қоймасындағы су көлемі — 2593 млн м3 (жобалық қуатының 79 пайызы), су жіберу көлемі — секундына 60 м3. 2025 жылғы 11 ақпанда Сергеев су қоймасында (ҚР Солтүстік Қазақстан облысы) 695,4 млн м3 су бар, су жіберу көлемі — секундына 18,3 м3″, — деп жазылған ҚР Су ресурстары және ирригация министрлігінің ресми хабарламасында.
Бұған дейін де Батыс Қазақстан облысының тұрғындарын «су тасқынының видеосы» шошытты. WhatsApp мессенджерінде ірі көлемдегі су тасқынының видеосы тарап кеткен болатын. Алайда ақпарат жалған болып шықты.
Айта кетейік, Ириклин су қоймасы — Ресейдің Орынбор облысындағы су қоймасы. Ал БҚО былтыр — су тасқынының астында қалған өңірлердің бірі. Бұған дейін биыл да қауіп бары айтылды.
