Батыс Қазақстан облысында Жеңіс күніне орай батырлар рухына тағзым ету рәсімі өтті, деп жазады Ertenmedia.kz.
Өңір тұрғындары Жеңіс алаңына жиналып, Отан үшін от кешкен майдангерлерді еске алды. Мәңгілік алауға гүл шоғын қою рәсімін облыс әкімі Нариман Төреғалиев пен соғыс ардагері Константин Кочережкин бастады.
Батыс Қазақстан облысынан қан майданға 76 мың азамат аттанған. Олардың жартысына жуығы туған жерге оралмады. Жиынға қатысқан тұрғындар сол ерлікті еске алып, аға буынның рухына құрмет көрсетті.
Қазір облыста 6 соғыс ардагері және 1,5 мыңнан астам тыл еңбеккері тұрады. Жеңістің 81 жылдығына орай оларға және Екінші дүниежүзілік соғысқа қатысы бар өзге санаттағы азаматтарға біржолғы әлеуметтік көмек берілді.
Жеңіс алаңындағы тағзым рәсімі тек мерекелік шара емес. Ол ел үшін жанын қиған буынның ерлігін ұмытпауға, бейбіт күннің қадірін түсінуге және ұрпақтар сабақтастығын сақтауға арналған маңызды құрмет белгісі болды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
