Мемлекет басшысы Қасым-Жомарт Тоқаев Xinjiang Lihua компаниясы директорлар кеңесінің төрағасы Чжан Цихаймен кездесіп, елімізде ірі мақта-тоқыма өндірісін құру мәселесін талқылады, деп жазады Ertenmedia.kz.
Кездесу барысында Қазақстанда толық өндірістік циклге негізделген ірі мақта-тоқыма кластерін дамыту мәселесі талқыланды. Жоба мақта өсіруден бастап дайын тоқыма өнімін шығаруға дейінгі барлық кезеңді қамтиды.
Ақорданың мәліметінше, қазіргі уақытта екі мақта өңдеу зауыты іске қосылған. Алдағы жылдары компания тоқыма өндірісін тереңдетіп, мата және тоқыма бағытындағы қосымша өнім шығаруды жоспарлап отыр.
Жоба аясында мақта егісінің көлемін 52 мың гектарға дейін ұлғайту көзделген. Бұл бағытта цифрлық технология мен тамшылатып суғару жүйесі қолданылады. Су мәселесі күрделі оңтүстік өңірлер үшін мұндай тәсіл ерекше маңызды саналады.
Жобаның алғашқы кезеңіне 360 млн доллар инвестиция тартылмақ. Сонымен қатар 4 мыңнан астам жаңа жұмыс орнын ашу жоспарланып отыр.
Қасым-Жомарт Тоқаев бұл жобаның оңтүстік аймақтардағы агроөнеркәсіп кешені мен жеңіл өнеркәсіпті дамыту үшін маңызды екенін атап өтті. Президент су үнемдеу технологиясы, цифрлық шешімдер және жасанды интеллект элементтерін енгізудің маңыздылығына да ерекше тоқталған.
Қазақстан ұзақ жылдар бойы мақтаны негізінен шикізат ретінде экспорттап келді. Ал мұндай жоба мақтаны ел ішінде өңдеп, қосылған құны жоғары дайын өнім шығаруға мүмкіндік береді. Бұл өз кезегінде тек ауыл шаруашылығына емес, жеңіл өнеркәсіп, логистика және экспорт бағытына да әсер етуі мүмкін.
Оңтүстік өңірлер үшін мұндай өндірістің әлеуметтік маңызы да жоғары. Себебі мақта шаруашылығы көп жұмыс күшін қажет етеді. Егер жоба толық іске асса, ауыл шаруашылығы мен өнеркәсіпті қатар байланыстыратын жаңа өндірістік тізбек қалыптасуы ықтимал.
Қазақстанның Цифрлық даму министрлігі елде ірі дата-орталық салу жөнінде халықаралық консорциуммен меморандумға қол қойды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
