СҚО әкімдігінің отырысында «Таза Қазақстан» республикалық акциясының жүзеге асырылуы туралы мәселе қаралды,- деп хабарлайды Ertenmedia.kz
Акция басталғаннан бері облыста 271 шара ұйымдастырылып, 2,8 мың экологиялық акция өткізілді. Мерекелік шаралардың маңызды бөлігі ретінде халықпен түсіндіру жұмыстары жүргізіліп, 638 кездесу өткізіліп, онда санитарлық талаптар мен экологиялық мәдениетті қалыптастыру мәселелері талқыланды.
Сенбіліктерге 158 мыңнан астам адам, 6,1 мың бизнес субъектісі және 63 өнеркәсіптік кәсіпорын қатысты. Жүргізілген жұмыстар нәтижесінде 578 тарихи-мәдени ескерткіштер, 200-ден астам саябақ пен сквер, 23 субұрқақ тазартылды. Қоқыс жинауға 2,4 мың бірлік техника тартылды. 53 мың аула аумағы тазартылды, 167 мың тонна қоқыс полигондарға шығарылды. Сондай-ақ, 34 мыңнан астам ағаш пен 3,2 мың бұта отырғызылды.
Мемлекет басшысы «Таза Қазақстан» акциясы бір реттік шара емес, экологиялық мәдениетті қоғамда енгізудің ұлттық міндеті екендігін атап өтті. Облыс әкімі бизнес-қоғамдастығын, депутаттарды, қоғамдық пікір көшбасшыларын, үкіметтік емес ұйымдарды және облыс тұрғындарын экологиялық ұстанымды қалыптастыруға, қоршаған ортаны сақтауға және «Таза Қазақстан» акцияларына белсене қатысуға шақырды.
Кеңес қорытындысы бойынша өңір басшысы мемлекеттік органдарға экологиялық мәдениетті дамыту жөніндегі Концепцияны жүзеге асыруға арналған өңірлік жоспардың орындалуын қамтамасыз ету, ағаш отырғызу және аумақтарды тазарту жұмыстарын жандандыру бойынша тапсырмалар берді. Сондай-ақ, тұрғындар арасында экологиялық сауаттылықты арттыру үшін түсіндіру жұмыстарын күшейту қажеттілігі атап өтілді.
