Қазақстан Республикасы Конституциясының 30 жылдығына арналған «Конституция және мемлекеттілік: құқық пен болашақ диалогы» атты ғылыми-практикалық конференцияда Мемлекет басшысы Қасым-Жомарт Тоқаев сөз сөйлеп, Ата Заңның мемлекетіміздің тұрақтылығы мен дамуындағы рөліне тоқталды, деп хабарлайды Ertenmedia.
Президент жиынды еліміздің тарихындағы маңызды белес деп атап, Конституция егемендігіміздің айнымас темірқазығы екенін айтты.
«Бүгінгі жиынның мән-маңызы айрықша. Осыдан 30 жыл бұрын бүкілхалықтық референдумда Қазақстан Республикасының Конституциясы қабылданды. Бұл – егемен еліміз үшін тарихи сәт болды. Шын мәнінде, Ата заңнан биік ештеңе жоқ. Себебі Конституция – мемлекеттігіміздің мызғымас тұғыры», – деді Мемлекет басшысы.
Қасым-Жомарт Тоқаев қазақ халқының ежелден заңға бағынған, ар-ұятқа жүгінген ұлт екенін атап өтті. Ол Қасым ханның қасқа жолы, Есім ханның ескі жолы, Әз Тәукенің Жеті жарғысы сияқты дала заңдары бүгінгі құқықтық жүйенің тарихи негізі болғанын жеткізді.
Президент соңғы жылдары жүзеге асқан конституциялық реформаларға кеңінен тоқталды. Оның айтуынша, елімізде Конституциялық соттың құрылуы азаматтардың құқықтарын қорғаудың жаңа тетігін қалыптастырды. Соның нәтижесінде екі жарым жыл ішінде 11 мыңнан астам өтініш қаралған.
Сондай-ақ, Әкімшілік рәсімдік-процестік кодекстің енгізілуі азаматтар мен кәсіпкерлердің мемлекеттік органдарға қарсы істерде 60 пайызға дейін жеңіске жетуіне мүмкіндік беріп отыр.
«Жүргізілген реформалар сот жүйесіне сенімді айтарлықтай арттырды. Судьяларды іріктеу және тағайындау үдерісі әділ әрі ашық болып, сот әкімшілігі жетілдірілді. Сот ісін жүргізу цифрландырылып, әділдік қағидаты нығая түсті», – деді Президент.
Мемлекет басшысы ел тарихындағы ерекше жаңашылдық ретінде Президенттің бір ғана жеті жылдық мерзімге сайлану қағидатын атады. Оның пікірінше, бұл қадам Қазақстанның саяси жүйесін барынша ашық әрі болжамды етуге ықпал етті.
Сонымен қатар, биліктегі отбасылыққа тосқауыл қойылып, Президенттің жақын туыстары үшін мемлекеттік қызмет атқаруға тыйым салынғаны да маңызды реформа болды.
«Халықтың осы шешімі – аса маңызды саяси-құқықтық жаңашылдық, әлемде баламасы жоқ конституциялық инновация», – деді Қ.Тоқаев.
Президент өз сөзінде Ата Заңның адам құқықтарын қорғаудың басты кепілі екенін тағы да баса айтты. «Қазақстанның ең қымбат қазынасы – Адам және оның өмірі, құқықтары мен бостандықтары» қағидаты әрқашан басты орында тұруы қажет екенін атап өтті.
