Ұлттық қауіпсіздік комитеті Алматыда халықаралық кокаин контрабандасының арнасын жойып, республика тарихындағы ең ірі бір реттік партияны тәркіледі, деп жазады Ertenmedia.kz.
ҰҚК мәліметінше, Алматыда салмағы 13 тонна 183 келі кокаин ұсталған. Тергеу нұсқасына сай, бұл жүк Қазақстан аумағы арқылы үшінші елдерге транзитпен жөнелтілуі тиіс болған.
Арнайы операция аясында осы арнаны ұйымдастыруға қатысы бар деген күдікпен екі шетелдік азамат ұсталып, қамауға алынған. Қазір Қылмыстық кодекстің 297-бабы 3-бөлігі бойынша сотқа дейінгі тергеп-тексеру жүріп жатыр. ҰҚК Қылмыстық-процестік кодекстің 201-бабына сәйкес өзге мәлімет жарияланбайтынын хабарлады.
Мұндай көлемдегі кокаиннің Алматыдан табылуы есірткі трафигінің енді жекелеген курьер не ұсақ арна деңгейінен әлдеқайда асып кеткенін аңғартады. Әңгіме транзиттік маршрут, халықаралық байланыс және көлеңкелі қаржы тетіктері қатар жүретін ірі жүйе туралы болып отыр. Сондықтан бұл оқиға жай ғана кезекті ұстау емес, Қазақстан аумағын пайдалануға тырысқан күрделі логистикалық арнаға соққы ретінде бағалануы мүмкін.
128 есірткі зертханасы жойылған
Жалпы есірткіге қарсы күрестің ауқымы да кеңейіп келеді. ІІМ дерегінше, 2025 жылы барлық құқық қорғау және арнаулы мемлекеттік органдар шамамен 4 мың есірткі қылмысын әшкерелеп, заңсыз айналымнан 49 тоннаға жуық түрлі есірткі затын тәркілеген. Сол кезеңде 128 есірткі зертханасы жойылған. Осындай фонда Алматыдағы 13 тоннадан асатын кокаин партиясы бұрынғыдан да ірі әрі қауіпті арна болғаны анық көрінеді.
Есірткі бизнесінің тағы бір қауіпті қыры – оның көлеңкелі қаржы инфрақұрылымымен астасып кетуі. 2026 жылғы қаңтарда Президентке Қаржылық мониторинг агенттігі есірткі саудасы мен алаяқтықтан түскен табысты жылыстатқан 22 көлеңкелі криптоайырбастау қызметінің жолы кесілгенін баяндаған. Сол есепте 1 100-ден астам заңсыз онлайн криптоалмасу сервисі мен 20 мың «дроп-карта» бұғатталғаны, ал қаржы секторында ақшаны жылыстатуға күдік туған 2 мың компаниямен және 56 мың жеке тұлғамен іскерлік байланыс тоқтатылғаны айтылды. Демек, есірткі саудасы енді тек қойма мен тасымал деңгейінде емес, цифрлық төлем мен жасырын ақша арнасы арқылы да жұмыс істеп тұрғанын мемлекет ашық көріп отыр.
Сондықтан Алматыдағы соңғы операцияны бір ғана қылмыстық іс ретінде қарау аздық етеді. Мұнда Қазақстанның транзиттік бағытын пайдалану әрекеті, халықаралық есірткі логистикасы және көлеңкелі қаржы арналарының өзара байланысы анық байқалады. Алдағы тергеу осы арнаның нақты географиясын, оның артында тұрған тұлғаларды және Қазақстан арқылы өткен өзге бағыттардың бар-жоғын ашып беруі мүмкін.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
