Алматы облысында жасанды интеллект алыс болашақтың ұраны емес, күнделікті жұмысқа кірген нақты құралға айналып келеді, деп жазады Ertenmedia.kz.
Өңірлік коммуникациялар қызметінде өткен брифингте цифрлық технологиялар басқармасы басшысының орынбасары Артықбай Олжас пен Alatau Hub директоры Бексұлтан Нұрақын облыстағы цифрлық трансформацияның негізгі бағыттарын таныстырды. Олардың айтуынша, өңірдегі өзгеріс ең алдымен кадр дайындаудан басталған. Алматы облысында мемлекеттік қызметшілерді заманауи цифрлық құралдарды пайдалануға бейімдеу басты міндеттердің біріне айналған.
Alatau Hub базасында мемлекеттік қызметкерлерге ChatGPT, Midjourney және өзге де цифрлық сервистердің мүмкіндігі түсіндірілген. Бексұлтан Нұрақынның сөзінше, негізгі мақсат жасанды интеллектіні сирек қолданылатын жаңалық ретінде емес, күнделікті жұмыс мәдениетінің бір бөлігіне айналдыру. Яғни цифрлық құрал құжат әзірлеуде, талдау жасауда, ақпаратты жылдам өңдеуде және басқару шешімін жеңілдетуде нақты көмекші болуы керек.
Қауіпсіздік саласында да цифрлық жүйе кезең-кезеңімен орнығып келеді. Қазір облыста 9 мыңнан астам бейнебақылау камерасы полиция жұмысына қолдау көрсетіп отыр. Мектептер мен балабақшаларда Face ID және QR жүйелері енгізілген. Мұндай тетіктер тәртіпті күшейтуге, бақылауды жеңілдетуге және қауіпсіздік деңгейін арттыруға жол ашып отыр.
Жасанды интеллектіге қатысты жобалар Мемлекет басшысы Қасым-Жомарт Тоқаевтың жуырдағы Жолдауында айтылған басымдықтармен де сабақтас. Президент цифрландыру мен жасанды интеллект өңірлік дамудың қозғаушы күшіне айналуға тиіс екенін атап өткен еді. Алматы облысында осы бағыт нақты жобалар арқылы жалғасып жатыр. Мәселен, мемлекеттік басқару саласында Qonaev AI пилоттық режимде іске қосылған. Онымен қатар 18 елді мекенде орман өртін ерте анықтауға арналған ақылды камера орнатылып жатыр.
Контекст
2024 жылы Қонаевта ашылған Alatau Hub қысқа уақыт ішінде өңірдің цифрлық экожүйесінің өзегіне айнала бастаған. 2025 жылдың алғашқы жартысында мұнда 900-ден астам іс-шара өткен. No-code курстары 100-ден астам қатысушыға өз цифрлық жобасын әзірлеуге мүмкіндік берген. Осы алаң тек оқыту орталығы ретінде ғана емес, жаңа идеяны нақты өнімге айналдыратын орта ретінде қалыптасып келеді.
Astana Hub резиденттері де облысқа өз шешімдерін ұсынып отыр. Соның ішінде ауыл шаруашылығына арналған QazTracker жүйесі бар. Ол табынды тиімді басқаруға бағытталған. Осындай жобалар жасанды интеллектінің тек кеңсе мен әкімшілік салаға ғана емес, өндіріс пен агросекторға да еніп келе жатқанын көрсетеді.
Қазір Алматы облысында цифрлық шешімдер процесті жылдамдатуға, адами қатені азайтуға және ресурсты үнемдеуге қызмет етіп отыр. Осы үрдіске қарап, өңірді Қазақстандағы цифрландыру қарқыны жоғары аймақтың бірі деуге толық негіз бар.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
