Елорданың Байқоңыр ауданында полиция мен прокуратура қызметкерлері «Astana jastary» еріктілерімен бірге есірткі тасымалдаушыларға қарсы барлау жүргізді. Бұл қоғамды алаңдатып отырған ауыр қылмыспен күрестің бір бөлігі. Өндіріс ауданында соңғы кездері есірткі тасымалы жиілеп, қарапайым тұрғындардың да қауіпсіздігіне әсер ете бастағаны жасырын емес. Сол үшін құқық қорғаушылар мен еріктілердің бірлескен қимылы – қауіптің алдын алу бағытындағы маңызды қадам, – деп хабарлайды Ertenmedia.kz Астана қаласы әкімінің баспасөз қызметіне сілтеме жасап.
Барлау барысында аула-аулалар мен бос ғимараттар иісшіл иттердің көмегімен тексерілді. Көпшілік ойлайтындай, шөптің арасын тіміскілеп жүрген адамдардың бәрі тасымалдаушы емес, көбісі – өзіне зиянды әдеттің құлы болған тұтынушылар.
Ал нағыз қауіп есірткіні жеткізіп беретіндерде. Олар көбіне жастарды арзан «курьер» қызметіне пайдаланып, жеңіл табыс уәде етеді. Әлеуметтік желілер арқылы байланысып, тыйым салынған затты жасырын қоймаларға қалдырып, кейін мекенжайды айтып беретін тәсілге көшкен. Бұл қылмыстың жаңа технологиялық үлгісі десек те болады.
Полиция майоры Көпжасар Алпысбайұлының айтуынша, қазіргі күрестің мәні тек адамдарды ұстауда емес, олардың қалдыратын ізін, жұмыс тәсілдерін ашуда жатыр. Өйткені есірткі саудагерлері бұрынғыдай ашық әрекет етпейді, бәрін интернет пен жасырын жүйелер арқылы жүргізеді. Бұл – қоғам үшін қауіпті құбылыс. Жастарды азғыру, олардың өмірін қию – нағыз қылмыстың көрінісі.
Астанада қазір «Заң және Тәртіп» қағидаты аясында ауқымды айлық жүріп жатыр. Жастарға түсіндіру жұмыстары жасалуда, оқу орындарында арнайы кездесулер ұйымдастырылуда, интернет-ресурстардағы жасырын парақшалар анықталып, бұғатталуда. Мұның бәрі тек полицияның ғана емес, бүкіл қоғамның ортақ ісі. Қауіпке қарсы тұру – әр азаматтың парызы. Өйткені есірткімен уланған ұрпақ – болашағымызға жасалған ең ауыр соққы.
