Мемлекет басшысы тапсырмасына сәйкес Оқу-ағарту министрлігі 2023 жылдан бастап Президенттік жастар кадрлық резерві үлгісінде «Білім берудегі өзгерістердің 1000 көшбасшысы» жобасын іске асырып келеді. Жобаның мақсаты – білім беру жүйесін жаңғыртуға, басқару тиімділігін арттыруға және оң өзгерістерді жүзеге асыруға қабілетті жаңа буын көшбасшыларын даярлау.
Бүгін Оқу-ағарту министрі Жұлдыз Сүлейменова жобаның қорытынды кезеңінде кадрлық резервке енген педагогтермен кездесті. Биыл 411 үміткер қорытынды бағалаудан өтіп, әңгімелесуге шақырылған болатын. Нәтижесінде 403 қатысушы кадрлық резервке қабылданып, оларға министр арнайы сертификаттар табыстады.
Кездесу барысында Жұлдыз Сүлейменова кадр резервіне енген білім саласының көшбасшыларымен еліміздегі білім беру жүйесін дамытудың негізгі бағыттарын талқылады. Министр соңғы жылдары мемлекет тарапынан білім сапасын арттыру, кадрлық әлеуетті күшейту, инфрақұрылымды жаңғырту және цифрландыру бағытында ауқымды жұмыстар жүргізіліп жатқанын атап өтті. Оның айтуынша, білім жүйесін тиімді реформалау ең алдымен басшылық құрамның трансформациясынан басталады.
«Мемлекет басшысы Қасым-Жомарт Кемелұлы Тоқаевтың қолдауымен 2019 жылдан бері білім саласын дамыту бойынша жүйелі жұмыстар жүргізілді. Білім берудегі өзгерісті басқаруда үш негізгі фактор бар – құндылық, қабілет және әрекет. Мектеп басшылары трансформациялық, стратегиялық және ситуациялық көшбасшылық дағдыларды меңгеріп, білім беру ұйымдарын тиімді басқарудың жаңа тәсілдерін қолдана білуі қажет. Әрбір оқушының жеке қабілеті мен ерекшелігін ескере отырып, барлығына тең мүмкіндік жасау – қазіргі білім берудің басты талабы. Бұл ретте педагогтердің кәсіби дамуын қолдау, мектеп мәдениетін адалдық пен жауапкершілік құндылықтарына негіздеу, білім алушыларға әрбір әрекеттің салдары болатынын ұғындыру аса маңызды», – деді министр.
Сонымен қатар, ол қазіргі цифрлық дәуірде жасанды интеллект технологияларын оқу үдерісіне сауатты әрі тиімді енгізудің маңыздылығын атап өтіп, мектеп басшыларына арналған «ЖИ дәуіріндегі табысты мектеп» моделін ұсынды.
Айта кетейік, «Білім берудегі өзгерістердің 1000 көшбасшысы» жобасы аясында қатысушылар үш деңгей бойынша – базалық, сараптамалық және кәсіби дайындықтан өтті. Бұған дейін 2023-2024 жылдары 583 педагог резервист атанды. Оның ішінде 397 басшының орынбасары, 186 педагог бар. Қазіргі уақытта олардың 419-ы немесе 71%-ы лаузымдарға тағайындалған.
Жобаны сәтті аяқтап, кадрлық резервке енген педагогтер бос басшылық лауазымдарға конкурстық рәсімдерден өтпей-ақ тағайындалу құқығына ие.
