АҚШ Конгресінің Өкілдер палатасы Қазақстанның Республика күніне орай ресми мәлімдеме жасады.
Конгресс мүшелері екі ел арасындағы стратегиялық серіктестіктің берік әрі ұзақ мерзімді екенін ерекше атап өтті, деп хабарлайды Ertenmedia ҚР Сыртқы істер министрлігіне сілтеп.
АҚШ конгрессмендері Билл Хайзенга (Мичиган), Роберт Адерхольт (Алабама), Джимми Панетта (Калифорния), Том Суози (Нью-Йорк) және Сидней Камлагер-Дав (Калифорния) Қазақстанды АҚШ-тың сенімді және болжамды серіктесі деп бағалады.
«Америкалық заң шығарушылар Қазақстанның тәуелсіздік жылдарындағы бейбітшілік пен тұрақтылықты нығайту жолындағы табыстарын жоғары бағалады. Олар еліміздегі демократиялық институттарды, ашықтықты және заң үстемдігін арттыруға бағытталған саяси-экономикалық реформаларды қолдайтынын жеткізді. Қазақстан ядролық қарусыздану мен дінаралық диалогтың көшбасшысы екені де ерекше аталды. Әсіресе, Астанада өткен Әлемдік және дәстүрлі діндер көшбасшыларының VIII съезі жаһандық бейбітшілік пен өзара түсіністікке қосылған елеулі үлес ретінде бағаланды», – делінген ҚР СІМ хабарламасында.
Конгресс өкілдері екі елдің экономикалық және энергетикалық әріптестігінің маңызын да ерекше атап өтті.
Олардың сөзінше, Chevron мен Wabtec секілді америкалық компаниялардың Қазақстандағы ірі жобалары АҚШ-тың өндірістік әлеуетін арттырып, екі ел арасындағы тұрақты байланысты нығайтуға ықпал етеді.
«Конгрессмендер Қазақстанға «Тұрақты қалыпты сауда қатынасы» (PNTR) мәртебесін беру мен ескірген Джексон-Вэник түзетуінің күшін жоюды қолдайтындарын жеткізді. Бұл екі ел арасындағы сауда-инвестициялық әріптестіктің әлеуетін толық ашуға мүмкіндік береді», – деп атап өтті СІМ.
Америкалық заң шығарушылардың айтуынша, өзара сыйластық, ортақ көзқарас және ұзақ мерзімді әріптестік АҚШ пен Қазақстан арасындағы қарым-қатынастың негізі болып қала бермек.
Тұшымды контентті Ertenmedia-ның телеграм арнасынан оқыңыз.
Қаламқас құпиясы: «ҚазМұнайГаздың» тендерсіз таңдаған инвесторы кім
