Ақтау қаласына күз салқыны енді ғана енгендей. Аспан бұлтты, бірақ әкімдік ғимаратының ішіндегі ауа райы жылы. Бүгін мұнда бірлік пен сабыр жайлы әңгіме өрбіді. Жай ғана кездесу емес, түбі тереңнен тартатын әңгімелер айтылған басқосу өтті. Маңғыстау облысының әкімі Нұрдәулет Қилыбай мен Қазақстан халқы Ассамблеясы мүшелері бас қосты. Ақсақалдар, Аналар кеңесінің өкілдері, этномедиаторлар – бәрі осында.
– Қазір бейбіт өмірдің қадірін түсінетін уақыт. Президент Қасым-Жомарт Тоқаев айтып жүрген «Біздің байлығымыз – бірлікте» деген сөз жай ұран емес. Бұл саяси бағдар, – деді жиынды ашқан әкім.
Ассамблея адам мен адамның арасына көпір бола білген құрылым. Онда шенеунік те бар, шебер де бар, шешен де, үнсіз де бар. Бірақ бәрінің жүрегі бір елдің тағдыры үшін соғады. Соның бір мысалын ҚХА Ақсақалдар кеңесінің төрағасы Оңайбек Әбділов айтты:
– Ауылда екі отбасы арасында түсінбестік туындап, үлкен дауға айналатын түрі болған. Этномедиация арқылы ардагерлер араласып, татуластырдық. Бұл бірлік үшін жасалған нақты қадам.
Залда отырғандар бас изеді. Әр сөз өмірден алынған мысал.
– Біз көпұлтты елміз, – деді «Вайнах» шешен-ингуш бірлестігінің өкілі Магомедсала Чучаев. – Бірақ бәріміз Қазақстан деген ортақ үйдің адамымыз. Ассамблея бізге бір-бірімізді тыңдауға, түсінуге мүмкіндік берді.
Әкім оған ризашылықпен қарап:
– Әрбір этнос өкілі осы елдің тағдырына ортақ тұлға. Татулық дегеніміз үнсіз келісу емес, саналы түрде бірге өмір сүру, – деді.
Сол сәтте сөз алған ҚХА Аналар кеңесінің төрайымы Амангүл Джайлханова:
– Ана жүрегі елдің тыныштығын тілейді. Біз жастармен жұмыс істейміз, ұлттық құндылықтарды дәріптейміз. Бірлік отбасынан басталады, – деп сөзін түйіндеді.
Жиын барысында армян этномәдени бірлестігінің мүшесі Татьяна Мурадян да сөз алып, өңірде медиация арқылы шешілген жанжалдар жайлы айтты. Тіл табысудың тетіктері, татулықтың жолы бар. Тек оған ұмтылатын ниет пен жүйелі әрекет керек.
Жиын соңында қатысушылар этносаралық қатынастарды реттеудің жаңа тетіктері мен ұсыныстарын ортаға салды. Ассамблея мүшелері бір ауыздан – Президенттің бағыты дұрыс, тек оны жергілікті жерде ұлағатты іспен жалғастыру керек деген ойға тоқтады.
– Бірлік деген – мерекеде бас қосу ғана емес. Ол күнделікті түсіністік, сабыр, бір-бірімізге деген құрмет. Біз осыны ұмытпауымыз керек, – деді жиынды қорытындылаған Нұрдәулет Қилыбай.
Сол сәтте залдан бір ақсақал күлімсіреп:
– Ел бірлігі ең үлкен байлық. Сол байлықтың күзетшісі болу – сіз бен бізге аманат, – деді.
Күздің салқыны сыртта қалды. Іште жұрттың сөзімен бірге жылынған сенім оты жанып тұрды.
