Airbus концерні шұғыл түрде шығарған директиваның салдарынан Қазақстандағы бірқатар әуе рейстері кешігуі мүмкін, деп хабарлайды Ertenmedia.
«Airbus ұшақтарын қолданатын барлық әуе компаниялары басқару компьютерлерінің бағдарламалық жүйесін тез арада жаңартуы тиіс. Бұл талап компанияның A320 сериясындағы ұшақтарына қатысты», – делінген хабарламада.
Бағдарламалық жүйені әр лайнер ұшар алдында міндетті түрде жаңартуы қажет. Осы себепті еліміздегі әуежайлардан ұшатын Airbus рейстері кешігуі мүмкін.
Жолаушыларға көмек көрсету мақсатында Азаматтық авиация комитеті мен Авиациялық әкімшілік тәулік бойы жұмыс істейтін жедел байланыс орталығын іске қосты.
Әуе рейстерінің статусын мына нөмірлер арқылы анықтауға болады:
Air Astana: +7 727 244 44 77, +7 7172 58 44 77, +7 702 702 44 77;
FlyArystan: +7 727 331 10 10 (WhatsApp: +7 702 702 02 27);
SCAT: +7 7252 99 88 80;
Qazaq Air: +7 727 356 14 14;
ҚР Авиациялық әкімшілігі: +7 7172 798 213;
Нұрсұлтан Назарбаев халықаралық әуежайы: +7 7172 702 999;
Алматы халықаралық әуежайы: +7 727 228 00 19.
Сондай-ақ жолаушыларға сапар алдында рейстің статусын әуе компанияларының ресми сайттарынан тексеріп алу ұсынылды.
Airbus ауқымды тексерісті A320 сериясындағы ұшақтардың басқару жүйесі соңғы уақытта бірнеше рет істен шығып, ұшу бағытын кенеттен өзгерткеннен кейін қолға алды. Компания мамандарының айтуынша, мұндай ақауларға күшті күн жарқылдары себеп болған. Әлем бойынша бұл тексеріс 6 мыңға жуық лайнерді қамтиды, яғни бұл қазір ұшып жүрген барлық A320 ұшақтарының жартысынан астамы.
