Әнші Әли Оқапов анасы, Қазақстанның халық әртісі Роза Рымбаеваға ерекше сыйлық жасап, көпшіліктің жүрегін елжіретті, деп жазады Ertenmedia.kz.
Әли бұл тосынсыйды алдын ала ойластырған. Анасына ештеңе сездірмей, оны автосалонға шақырған. Сырттай қарағанда бәрі қарапайым кездесу секілді көрінген. Әнші анасына «қызметкерлермен естелік суретке түсеміз» деп түсіндірген екен.
Алайда салтанатты сәтте жаңа автокөліктің кілті Роза Рымбаеваның өзіне табысталғанда, өнер иесі ерекше толқып кетті. Қазақ сахнасының ерке үніне айналған әнші сол сәтте ана ретінде баласының мейірімі мен ықыласын сезінді. Қуанышын жасыра алмай, тебіренген сәті көпшілікке де жылы әсер қалдырды.
Роза Рымбаева қазақ эстрадасының жарық жұлдызы. КСРО және Қазақстанның халық әртісі атанған өнер иесі 1975 жылдан бері сахнада ел ықыласына бөленіп келеді. Оның әндері бірнеше буынның жадында сақталып, қазақ музыкасының алтын қорына айналды.
Әли Оқапов – Роза Рымбаева мен белгілі музыкант Тасқын Оқаповтың үлкен ұлы. Бүгінде ол да әнші, композитор және продюсер ретінде өз жолын қалыптастырып келеді.
Анасына жасалған бұл сыйлық тек жаңа көлік тарту ету ғана емес. Бұл – перзенттің анасына деген алғысы, құрметі, жылдар бойы көрген мейірімге берген жауабы. Кейде үлкен сезімді ұзақ сөзбен жеткізудің қажеті жоқ. Бір тосынсый, бір қуанышты көзқарас, бір үнсіз тебіреністің өзі жүректегі махаббатты аңғартады.
Әлидің бұл әрекеті көпшілікке ананы қадірлеудің, ата-ана еңбегін бағалаудың әдемі үлгісін көрсетті. Ал Роза Рымбаева үшін бұл күн баласының биікке жетіп қана қоймай, жүрегіндегі перзенттік мейірімді сақтап қалғанын сезіндірген ерекше сәт болды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
