Қазақстанда республикалық маңызы бар автомобиль жолдарындағы жол белгілеріне ауқымды тексеру жүргізіледі, деп жазады Ertenmedia.kz.
Тексеру барысында мамандар жол белгілерінің дұрыс орналастырылуына, техникалық жағдайына, жүргізушілерге көріну деңгейіне және қолданыстағы жол қозғалысын ұйымдастыру талаптарына сәйкестігіне ерекше назар аударады.
Сонымен қатар соңғы уақытта жөндеу жұмыстары жүргізілген жол учаскелері де бақылауға алынады. Өйткені мұндай аумақтарда құрылыс кезеңінде қойылған уақытша белгілер немесе бұрынғы қозғалыс схемасына қатысты ескірген белгілер сақталып қалуы мүмкін.
Мамандар анықталған сәйкессіздіктерді жою жұмыстарын жүргізеді. Қажет болған жағдайда ескі белгілер алынып, олардың орнына жаңа әрі өзекті жол белгілері орнатылады.
Тексеру барысында қараңғы уақытта белгілердің көріну сапасы да бағаланады. Әсіресе жарық шағылыстыратын элементтердің болуы мен олардың жағдайына басымдық беріледі. Сондай-ақ жол белгілерінің нақты жол жағдайына сәйкес орнатылғаны да назардан тыс қалмайды.
Қазіргі таңда республикалық маңызы бар автомобиль жолдарында шамамен 140 мың жол белгісі орнатылған. Бұл көрсеткіш жол қозғалысын ұйымдастыру жүйесінің қаншалықты ауқымды екенін көрсетеді.
Жол қауіпсіздігін арттыруға бағытталған кешенді бағдарлама аясында жыл сайын орта есеппен 10 мыңнан астам жол белгісі жаңартылып келеді. Мәселен, 2021 жылы 11,4 мың белгі орнатылса, 2022 жылы бұл көрсеткіш 10,6 мыңды құрады. 2023 жылы 10,7 мың, 2024 жылы 11,2 мың және 2025 жылы 10,6 мың жаңа белгі қойылған.
Биыл республикалық жолдарда тағы шамамен 8 мың жол белгісін орнату және ауыстыру жоспарланып отыр.
Сарапшылардың пікірінше, жол белгілерінің дұрыс орналасуы мен уақытылы жаңартылуы жол-көлік оқиғаларының алдын алуда маңызды рөл атқарады. Әсіресе қозғалыс қарқыны жоғары республикалық трассаларда ақпараттың жүргізушіге дер кезінде әрі анық жетуі қауіпсіздік деңгейіне тікелей әсер етеді.
Жүргізіліп жатқан жұмыстар республикалық маңызы бар жолдардағы қозғалысты қауіпсіз етуге және жүргізушілер үшін қолайлы жағдай қалыптастыруға бағытталған.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
