Әл-Фараби атындағы Қазақ ұлттық университетінің студенттері «Таза Қазақстан» республикалық экологиялық акциясына қатысып, Іле және Күнгей Алатауы аумағындағы туристік соқпақтарды тазартты, деп жазады Ertenmedia.kz.
ҚазҰУ-дың «Туризм» білім беру бағдарламасының бірінші курс студенттері бірінші санаттағы оқу-жаттығу жорығын сәтті аяқтады.
Екі апта бойы болашақ туризм мамандары таулы аймақта тәжірибелік даярлықтан өтті. Олар туристік жорықтарды ұйымдастыру, бағытты жоспарлау, қауіпсіздік ережесін сақтау және табиғи ортада әрекет ету дағдыларын меңгерді.
Жорық барысында студенттер туристік техника мен тактиканың негіздерін үйренді. Сонымен қатар бағдарлау, лагерь құру, топпен жүру және туристік-рекреациялық ресурстарды ұқыпты пайдалану бойынша тәжірибе жинады.
Бағдарламада экологиялық мәдениетке ерекше мән берілді. Студенттер табиғатты тек тамашалап қана қоймай, оны қорғау жауапкершілігін де іс жүзінде көрсетті.
Осы мақсатта олар «Таза Қазақстан» акциясы аясында ерекше қорғалатын табиғи аумақтардағы туристік соқпақтар мен маршруттарды тазалау жұмыстарына қатысты.
Экологиялық акция Іле-Алатауы мемлекеттік ұлттық табиғи паркінің Түрген шатқалында өтті. Сонымен қатар Табан-Қарағай орманшылығындағы Далашық үстірті мен «Көлсай көлдері» мемлекеттік ұлттық табиғи паркінің аумағы қамтылды.
Табиғат қорғау мекемелерінің қызметкерлері қатысушыларға арнайы нұсқаулық өткізді. Олар экологиялық қауіпсіздік, табиғи мұраны сақтау және ұлттық парк аумағында жүріп-тұру ережелері туралы түсіндірді.
Тазалық жұмыстары аяқталғаннан кейін ұлттық парк өкілдері студенттердің белсенділігіне оң баға берді. Олар жастардың табиғатқа жанашырлық танытып, қоршаған ортаны қорғауға үлес қосқанын атап өтті.
ҚазҰУ өкілдерінің айтуынша, мұндай оқу-жаттығу жорықтары студенттердің кәсіби дайындығын күшейтеді. Сонымен қатар жас буынның туған жер табиғатына жауапкершілікпен қарауына ықпал етеді.
Болашақ туризм мамандары үшін мұндай тәжірибе маңызды. Себебі туризм тек саяхат ұйымдастырумен шектелмейді. Ол табиғи аумақтарды сақтау, туристік мәдениетті қалыптастыру және экологиялық қауіпсіздікті қамтамасыз етумен тығыз байланысты.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
