Қазақстанда курьер болып қосымша табыс тапқан аналарды әлеуметтік төлемнен айыру жоспарланып отырғаны туралы ақпарат шындыққа сәйкес келмейді, деп жазады Ertenmedia.kz.
Әлеуметтік желіде және кейбір ақпараттық пабликтерде бала күтіміндегі аналар курьер болып жұмыс істесе, мемлекеттен берілетін төлемнен айырылуы мүмкін деген мазмұндағы жазбалар тарады. Уәкілетті орган мұндай мәліметті жоққа шығарды.
Түсіндірмеге сәйкес, жұмыс істемейтін ата-аналарға бала бір жарым жасқа толғанға дейін республикалық бюджет есебінен мемлекеттік әлеуметтік жәрдемақы төленеді. Аталған жәрдемақы шартсыз сипатқа ие. Яғни ол белгіленген мерзім аяқталғанға дейін төленеді және алушының кейін жұмысқа орналасу ықтималдығына тәуелді емес.
Ал тұрақты жұмысы бар және міндетті әлеуметтік сақтандыру жүйесіне қатысатын ата-аналарға бала күтіміне байланысты табысынан айырылған жағдайда Мемлекеттік әлеуметтік сақтандыру қорынан әлеуметтік төлем қарастырылған. Оның мөлшері бала туған күнге дейінгі соңғы екі жылдағы орташа айлық табыстың 40 пайызы негізінде есептеледі.
Әлеуметтік кодекс нормалары бойынша мұндай төлемді жұмысқа шыққан кезде тоқтату тек алушының өз еркімен берген өтініші негізінде ғана жүзеге асады. Демек, қосымша жұмыс немесе табыс туралы ақпарат әлеуметтік төлемді автоматты түрде тоқтатуға негіз болмайды.
Уәкілетті органдар БАҚ өкілдерін, блогерлерді және паблик әкімшілерін ресми мәлімдемелерді дұрыс түсіндіруге шақырды. Азаматтарды шатастыратын тақырып пен тұжырымнан сақ болған жөн.
Тұрғындарға әлеуметтік төлемдерге қатысты ақпаратты тек ресми дереккөздерден тексеру ұсынылады. Күмән туындаған жағдайда тиісті мемлекеттік органға тікелей жүгінген дұрыс.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
