Бейсенбі күні Каспий теңізінде Қазақстан Әскери-теңіз күштері (ӘТК) қызметкерлерінің қаза табуы – ел тәуелсіздігі жылдарында су айдындарында әскери қызметшілердің бақилық болуымен байланысты алғашқы қайғылы оқиға емес, деп хабарлайды Ertenmedia.kz.
ҚазТАГ редакциясы қарастырған мәліметтер мен жарияланымдарға сәйкес, бүгінгі күнге дейін Қазақстан су айдындарында әскери қызметшілер қаза тапқан бірнеше қайғылы оқиға тіркелген.
Су айдындарындағы қайғылы оқиғалар шежіресі
2007 жылғы 31 тамызда Түркістан облысындағы Келес өзенінде контрабандашылармен қақтығыс кезінде Ұлттық қауіпсіздік комитеті (ҰҚК) Шекара қызметінің әскери қызметшісі Ерлан Ниязов қаза тапты.
2015 жылғы 18 қыркүйекте Маңғыстау облысында «Центр-2015» оқу-жаттығуы барысында «Оймаша» полигонынан 5 шақырым қашықтықта алты БТР-80 және 52 әскери қызметші теңізге шығып, шамамен 150 метр жүргенде қатты жел мен биік толқын салдарынан төрт БТР-80 батып кеткен. Сол кезде мерзімді қызметтегі төрт әскери қызметші суға кетіп, мерт болды.
Сол оқиғаға кінәлілерге үкім тек 2016 жылдың қарашасында шығарылды. «Батыс» өңірлік қолбасшылығының экс-қолбасшысы Мұрат Нұғұманов, теңіз жаяу әскерлері бригадасының бұрынғы командирі Ерболат Толықбаев және 25744 әскери бөлімі теңіз жаяу әскерлері командирінің орынбасары Рашид Жылқайдаров 2,5 жылға қоныс колониясына сотталды. 25744 әскери бөлімі екінші батальоны бесінші ротасының теңіз жаяу әскерлері екінші бөлімшесінің командирі Абай Баймұратов 1,5 жылға қоныс колониясына бас бостандығынан айырылды. 25744 әскери бөлімінің теңіз жаяу әскерлері взвод командирі Бауыржан Төлегенов пен екінші батальон бесінші ротасының үшінші бөлімше командирі Ерасыл Көбеген алты айға бас бостандығынан айырылып, оларға ҚР ҚК-нің 63-бабы қолданылып, нәтижесінде сот оларға шартты мерзім тағайындады.
2017 жылғы 11 желтоқсанда «Семсер» әскери кемесінің бортынан мерзімді әскери қызметші Бейбіт Башықов теңізге құлап кетті. Матростың денесі сол күйі табылған жоқ.
Маңғыстау облысында болған бұл қайғылы оқиға – Қазақстанның су айдындарында әскери қызметшілер арасында тіркелген төртінші әрі құрбандар саны бойынша ең ірі трагедия.
Айта кетейік, бұл шежіреге әскери қызметшілердің демалыс кезінде су айдындарында қаза тапқан оқиғалары енгізілген жоқ.
Тергеу амалдары мен құрылған үкіметтік комиссия
Бұған дейін Маңғыстау облысындағы оқу-жаттығу кезінде алдын ала мәлімет бойынша 19 әскери қызметшіні теңізге ағызып әкеткені белгілі болған. Олардың тоғызы қаза тапқаны расталды.
Кейінірек Бас прокуратура аталған дерек бойынша қылмыстық іс қозғалғанын мәлімдеді.
Сондай-ақ оқиғаның себептерін тексеру үшін үкіметтік комиссия құрылды.
Қазақстанға алғашқылардың бірі болып Әзербайжан көңіл айтты.
Мемлекет басшысы Қасым-Жомарт Тоқаев көңіл айтып, үкіметтік комиссияға оқиғаның мән-жайын анықтау және қаза тапқандардың отбасыларына көмек көрсету үшін барлық қажетті шараларды қабылдауды тапсырды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
