Алматы қаласында Орталық Азияның отын-энергетика секторындағы аса ірі оқиғалардың бірі саналатын «Мұнай және газ» – KIOGE 2026 30-шы мерейлі халықаралық көрмесі мен конференциясы өз жұмысын бастады, деп хабарлайды Ertenmedia.kz. Үш онжылдық бойы сала мамандарының бас қосатын басты диалог алаңына айналған жиынға мемлекеттік құрылымдар, ұлттық операторлар мен халықаралық корпорациялардың өкілдері жиналды.
Ауқымды шараға Энергетика министрлігі, Алматы қаласының әкімдігі, KAZENERGY қауымдастығы, «ҚазМұнайГаз» ұлттық компаниясы, сондай-ақ PSA, IMBC, KazService және Petrocouncil ұйымдары ресми қолдау білдіріп отыр.
Отыз жылдық тарих және кеңейген халықаралық география
KIOGE көрмесі 30 жыл бойы мұнай-газ кешеніндегі өзекті мәселелер мен стратегиялық міндеттер шешілетін кәсіби алаң қызметін атқарып келеді. Мұнда озық жабдық өндірушілері, IT-әзірлеушілер, сервистік кәсіпорындар және инвесторлар бас қосып, келісімшарттар жасасады.
«Отыз жылдық тарихы бар халықаралық көрмеге әлемнің 30 елінен 500 жетекші компания қатысып, энергетика секторының болашағын талқылауда».
Мерейтойлық жыл аясында форумның географиялық ауқымы айтарлықтай кеңейді. Қазақстаннан бөлек көрмеге Әзербайжан, Австрия, Ұлыбритания, Германия, Үндістан, Италия, Қытай, Нидерланд, БАӘ, Сауд Арабиясы, АҚШ, Түркия сынды елдердің алпауыт өндірушілері қатысып жатыр. Қатысушылар өздерінің озық технологияларын, сатып алу бағдарламаларын және жергілікті кәсіпорындармен бірлескен жобаларын таныстыруда.
Жаһандық теңгерім мен стратегиялық басымдықтар
Іскерлік бағдарламаның басты оқиғасы ретінде «Мегажобалардан нарықтардағы көшбасшылыққа: Қазақстан жаһандық энергетикалық теңгерімде» тақырыбындағы халықаралық конференция ұйымдастырылды. Сарапшылар әлемдік энергетикалық жүйенің архитектурасы өзгерген кезеңде еліміздің ұстанатын бағытын кеңінен қарастыруда.
Атап айтқанда, пленарлық отырыста Қазақстанның 2030 жылдан кейінгі жаһандық энергетикалық күн тәртібіндегі орны, халықаралық технологиялық әріптестік және аса маңызды пайдалы қазбаларды игеру тетіктері сөз болды. Қазіргі даму кезеңінде шикізатты жай ғана өндіру жеткіліксіз, ендігі басты назар терең өңдеу мен өнімнің өзіндік құнын арттыруға аударылып отыр.
Жасанды интеллект, логистика және отандық өндіріс
Конференция сессиялары геологиялық барлау жұмыстарында жасанды интеллект пен цифрлық шешімдерді пайдалану, экспорттық тасымал бағыттарының қауіпсіздігі мен геосаясаты мәселелерін қамтыды. Сонымен қатар көміртегі ізін азайту және ESG қағидаттарын енгізу жайы талқыланды.
«Басты мақсат – қазақстандық мұнай-газ машина жасау саласының әлеуетін арттыру, жергілікті қамтуды кеңейту және өндірістік стандарттарды жаңғырту».
Форум аясындағы маңызды жиындардың бірі мұнай-газ саласына қажетті машина жасауды дамытуға арналды. Отандық өндірушілерді ірі мұнай операторларының тапсырыстарымен қамту, тауарлар мен қызметтерді сертификаттау және жабдықтарды ел ішінде өндіру мәселелері талқыланды. Екі күндік конференция қорытындысы бойынша саланы дамытудың жаңа форсайт-жоспарлары қабылданады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
