«Астана Опера» театрында «Астана кештері» XV халықаралық өнер фестивалі өтті. Іс-шараны DEGDAR гуманитарлық қоры ұйымдастырды, деп хабарлайды Ertenmedia.kz.
Фестиваль Оңтүстік Африканың әншісі Белинда Дэвидстің Уитни Хьюстон әндеріне арналған концертімен ашылды. Кештің арнайы қонағы – италиялық рок әншісі Симоне Романато.
Өнер фестивалінің екінші күні Non-Stop OPERA бағдарламасының премьерасы өтті. Астана, Алматы және Ташкент театрларының тоғыз солисі 12 операдан 11 жеке ария мен алты дуэт орындады. Олардың қатарында Джоаккино Россинидің «Реймске саяхат» және Джузеппе Вердидің «Фальстаф» операларынан үзінділер болды. Оркестрге италиялық дирижер Этторе Пападиа жетекшілік етті.
Алдағы уақытта бұл қойылымды «Астана Опера» театрының тұрақты репертуарына енгізу жоспарланып отыр.
Классикалық кеш және 15 жылдық тарих
Фестивальдің соңғы кешінде Беларусь дирижері Евгений Бушковтың жетекшілігімен оркестр Вивальди, Бах, Гендель және Марчеллоның шығармаларын орындады. Концертте француз гобойшысы Жером Гишар, флейташы Ержан Кушанов және Қазақстанның мемлекеттік FORTE TRIO триосы өнер көрсетті.
«15 жыл ішінде фестивальге мыңнан астам өнерпаз қатысып, көрермен саны 100 мыңнан асты. «Астана кештері» – еліміздің мәдени құндылықтарын дәріптеп, өскелең ұрпақтың өнерге деген қызығушылығын арттыруға және дүниетанымын кеңейтуге бағытталған бірегей жоба», – деді DEGDAR гуманитарлық қоры мен фестивальдің директоры Лаура Ахметова.
«Астана кештері» фестивалі қазақстандық көрермендерді әлемдік музыка өнерінің үздік үлгілерімен таныстырып, халықаралық мәдени байланысты нығайтуға ықпал етіп келеді.
Айта кететіні, биыл фестиваль DEGDAR қорының 25 жылдығымен тұспа-тұс келді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
