«ҚазМұнайГаз» кен орындарының басым бөлігі ондаған жылдар бойы игеріліп келеді. Қабат қысымының төмендеуі мен сулану деңгейінің артуына байланысты өндіру көлемін ұстап тұру барған сайын күрделі әрі қымбатқа түсуде. Сондықтан ҚМГ толысқан кен орындарында мұнай беруді арттыруға басымдық беруде, деп хабарлайды Ertenmedia.kz.
Компанияның өндірістік активтерінде көлденең бұрғылау, қабатты көп сатылы гидравликалық ажырату, бүйірлік оқпандарды бұрғылау, полимерлік су айдау, жылу әдістері және өзге де технологиялық шешімдер қолданылады.
Жаңа әдістер алдымен жекелеген ұңғымалар мен учаскелерде сыналады. Техникалық және экономикалық тиімділігі расталған жағдайда олар кең ауқымда енгізіледі.
Мұнай беру коэффициентін арттыру стратегиясы
Мұнай өндіру коэффициентін арттыру стратегиясы аясында ҚМГ тоғыз базалық технологияны айқындады.
Бұл технологияларды қолдану кен орындарының өмірлік цикліндегі жиынтық өндірісті 155 млн тонна мұнайға ұлғайтып, мұнай беру коэффициентін 37%-дан 42%-ға дейін арттыруға тиіс.
Нәтиже қазірдің өзінде өндірістік көрсеткіштерден көрініс табуда. 2026 жылдың сегіз айында жаңа технологиялар жоспарланған 387 мың тоннаның орнына 424 мың тоннаға жуық қосымша мұнай берді.
Жыл соңына дейін ҚМГ шамамен 1 млн тонна қосымша өндіруді, яғни жалпы өндіріс көлемінің шамамен 5%-ын қамтамасыз етуді көздеп отыр. Салыстыру үшін айтсақ, 2025 жылы технологиялық іс-шаралар компанияға қосымша 434 мың тонна мұнай әкелген болатын.
Өндірісті цифрландыру және жасанды интеллект
Бөлек бағыт ретінде цифрландыру жүргізілуде. «Ембімұнайгаз» компаниясының Шығыс Молдабек кен орны цифрлық телнұсқа енгізілген алғашқы нысанға айналды. Аталған модель жасанды интеллект көмегімен өндіруді болжауға, өндірістік процестерді талдауға және оңтайлы шешімдерді қабылдауға мүмкіндік береді.
ҚМГ сондай-ақ жасанды интеллект және Big Data негізінде өзінің жеке ABAI жүйесін дамытуда. Ол ұңғымалардың жұмысын талдауға, су айдауды басқаруға және геологиялық-техникалық шараларды іріктеуге пайдаланылады.
Осылайша, «ҚазМұнайГаздың» негізгі өсім резерві тек жаңа кен орындарын ашумен ғана емес, игеріліп жатқан активтерден мұнайды барынша тиімді өндірумен де тікелей байланысты.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
