Алматы Қытайдан келетін туристер санын арттырып қана қоймай, халықаралық конференциялар, корпоративтік жиындар мен іскерлік кездесулер өтетін маңызды орталыққа айналуды көздеп отыр. Осы мақсатта қала әкімдігі іскерлік туризмді дамытуға және Алматының мүмкіндіктерін Қытай нарығында кеңінен таныстыруға басымдық беруде, – деп жазады Ertenmedia.kz.
Бұл бағыттағы маңызды қадамның бірі – Алматының 3-5 қараша аралығында Бейжің қаласында өткен China International MICE Exchange – CIMX Beijing 2026 халықаралық көрмесіне қатысуы. Аталған іс-шара іскерлік сапарлар, халықаралық конференциялар, көрмелер мен корпоративтік турларды ұйымдастыру саласындағы ірі кәсіби алаңдардың бірі саналады.
Көрмеде Visit Almaty өкілдері қытайлық туроператорлармен, корпоративтік сапарларды ұйымдастыратын компаниялармен және туристік индустрия мамандарымен кездесті. Оларға Алматының қонақүй инфрақұрылымы, конференция өткізуге арналған алаңдары, көлік қатынасы, табиғи және мәдени орындары таныстырылды.
Қытайдан келетін туристер саны артып келеді
Қытай Алматы үшін туристік әлеуеті жоғары әрі стратегиялық маңызы бар нарықтардың бірі болып отыр. 2025 жылдың қорытындысы бойынша мегаполиске Қытай Халық Республикасынан 136 419 турист келген. Бұл 2024 жылмен салыстырғанда 37,6 пайызға артық.
Туристік ағынның өсуіне Алматы мен Қытайдың ірі қалалары арасындағы тікелей әуе қатынасы да ықпал етіп келеді. Қазіргі уақытта Алматыдан Бейжің, Шанхай, Гуанчжоу және Үрімжі қалаларына тікелей рейстер орындалады. Мұндай байланыс туристерге ғана емес, кәсіпкерлерге, инвесторларға және халықаралық компания өкілдеріне де сапарын алдын ала жоспарлауға мүмкіндік береді.
Алматының іскерлік туризмдегі басты артықшылығы – жұмыс сапарын демалыспен ұштастыруға қолайлы жағдайдың болуы. Халықаралық жиынға немесе корпоративтік кездесуге келген қонақтар бос уақытында тау курорттарына барып, қаланың мәдени орындарын аралай алады. Сондай-ақ ұлттық тағамнан дәм татып, Алматының табиғаты және тарихи нысандарымен танысуға мүмкіндік бар.
Бұл ерекшелік Алматыны тек келіссөз өтетін қала ретінде емес, қонақтарға толыққанды туристік әсер сыйлайтын бағыт ретінде танытуға жол ашады. Қалада заманауи қонақүйлер, мейрамханалар, іскерлік орталықтар мен түрлі деңгейдегі конференция өткізуге арналған алаңдар жұмыс істейді.
Алматы халықаралық іс-шараларды тартуға дайын
CIMX Beijing 2026 көрмесі аясында Visit Almaty өкілдері Қытайдың туристік нарығындағы серіктестермен бірқатар келіссөз жүргізді. Тараптар бірлескен туристік бағдарламалар әзірлеу, Алматыны қытайлық корпоративтік клиенттер арасында ілгерілету және қалада халықаралық іс-шаралар ұйымдастыру мүмкіндіктерін талқылады.
Сонымен бірге қытайлық туристердің талғамына сай жаңа маршруттар қалыптастыру, қызмет көрсету сапасын жақсарту және ақпараттық материалдарды қытай тілінде ұсыну мәселелері де маңызды бағыттардың бірі саналады. Қытай нарығында Алматыны жүйелі таныстыру туристік компаниялар арасындағы байланысты күшейтіп, жаңа топтық және корпоративтік сапарлардың ашылуына ықпал етуі мүмкін.
Бейжіңдегі халықаралық көрмеге 41 ел мен өңірден туризм индустриясының 3 мыңнан астам өкілі қатысты. Қатысушылар кәсіби қауымдастыққа өз елдері мен қалаларының туристік мүмкіндіктерін таныстырып, жаңа әріптестік байланыстар орнатты.
Алматының мұндай халықаралық алаңдарға қатысуы қалаға Қытайдан келетін туристер санын көбейтуге, іскерлік сапарлар аясын кеңейтуге және халықаралық іс-шараларды тартуға мүмкіндік береді. Бұл өз кезегінде қонақүй, қоғамдық тамақтану, көлік, сауда және қызмет көрсету салаларының дамуына серпін беріп, Алматының өңірдегі жетекші туристік әрі іскерлік орталық ретіндегі беделін нығайтады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
