Қытайда FAW-Toyota бірлескен кәсіпорны 2027 жылғы модельдік қатарға арналған жаңартылған Avalon седанын ресми түрде көрсетті. Сыртқы келбеті, әсіресе алдыңғы бөлігі заманауи Toyota Camry XV80 моделіне қатты ұқсайды. Алайда ұзындығы бес метрден асатын жаңа көлік көлемі жағынан толыққанды F-санатына әлдеқайда жақын орналасқан, деп хабарлайды Ertenmedia.kz.
Қозғалтқыш түрлері мен техникалық ерекшелігі
Avalon моделі Camry секілді TNGA-K платформасына негізделген және дәл сондай күштік құрылымдармен жабдықталған. Көліктің базалық нұсқасына вариатормен жұптасқан, қуаты 173 ат күшіне тең 2.0 литрлік бензинді қозғалтқыш орнатылған.
Сонымен бірге тұтынушыларға гибридті екі түрлі нұсқа ұсынылады. Біріншісі — 2 литрлік іштен жанатын қозғалтқыш негізіндегі кіші гибрид. Оның жалпы қуаты 152 ат күшін құрайды, ал 100 шақырымға орташа жанармай шығыны небәрі 4.3–4.5 литр шамасында. Екіншісі — жиынтық қуаты 236 ат күшіне жететін 2.5 литрлік үлкен гибридтік жүйе, бұл нұсқа 100 шақырымға шамамен 4.6 литр отын жағады.
Седан қала ішіндегі кептелісте тек электр қуатымен қозғалады. Ал екпінді жылдамдық алу кезінде бензинді қозғалтқыш пен электр моторы бір мезгілде іске қосылып, E-CVT планетарлық беріліс қорабы арқылы бірқалыпты әрі жұмсақ тарту күшін қамтамасыз етеді.
Салон кеңістігі, мультимедиа және жайлылық
Интерьер жағынан автокөлік едәуір заманауи деңгейге көтерілген. Седанның бастапқы нұсқалары 10.25 дюймдік орталық экранмен шықса, ортаңғы және жоғарғы жиынтықтарға 15.6 дюймдік үлкен тачскрин орнатылады. Цифрлық аспаптар панелі барлық модификацияда бірдей — 8.8 дюйм, ал маңдай әйнегіне мәлімет түсіретін HUD-дисплей тек қымбат комплектацияларға арналған.
Мультимедиа кешені Apple CarPlay, Huawei HiCar және ICCOA Carlink жүйелері арқылы кез келген смартфонмен байланыса алады. Салонда 8 немесе 14 динамик және 50 ваттық сымсыз қуаттағыш бар. Сонымен қатар көлікте жылыту және желдету функциясы бар орындықтар, алдыңғы қатар үшін массаж опциясы, электрлі оттоманкалар және күннен қорғайтын пердесі бар панорамалық шатыр қарастырылған.
Қауіпсіздік жүйесі және көмекші ассистенттер
Жаңартылған седанға бұрынғы TSS кешенінің орнына заманауи Toyota Pilot қауіпсіздік жүйесі енгізілді. Бастапқы нұсқалар 8–11 қызметтен тұратын базалық пакетпен шектелсе, ортаңғы және флагмандық нұсқалар 14 функцияға дейін кеңейтілген автопилотпен қамтылған. Оның ішінде көлікті жолақта ұстау, кедергілер алдында автоматты тежеу, адаптивті круиз-бақылау және көрінбейтін аймақтарды бақылау жүйелері бар.
Қауіпсіздікті күшейту мақсатында Avalon-ның барлық нұсқасына базалық деңгейден бастап бірден 10 қауіпсіздік жастығы стандартты түрде орнатылған.
Комплектациялар мен нарықтағы бағасы
Өндіруші жаңа модельге арналған жабдықталудың жеті түрлі деңгейін әзірлеген:
- Бастапқы деңгей (Entry-Level/Premium): 2.0 литрлік бензинді қозғалтқыш пен 2.0 HEV гибриді үшін қолжетімді. Ресми бағасы 178 800 юаньнан (~12 млн теңге) басталады, алайда арнайы жеңілдікпен оны 133 800 юаньға (~9 млн теңге) сатып алуға болады;
- Бизнес-класс (Luxury/Honor/Exclusive): бұл санат тек 2.0 HEV гибридімен ұсынылады. Номиналды бағасы — 207 800 юань (~14 млн теңге), ал жеңілдікпен 158 000–165 000 юань (~10.6–11.1 млн теңге) аралығында;
- Флагмандық деңгей (XLE Premium/Limited Flagship): 2.5 HEV үлкен гибридімен жабдықталған. Ресми бағасы — 236 800 юань (~15.9 млн теңге), жеңілдік кезеңінде — 191 800 юань (~12.9 млн теңге).
Айта кету керек, Қытай нарығында жақын арада жаңартылған Camry XV80 таныстырылады деп күтілуде. Салыстыру үшін айтсақ, Қазақстанның ресми автосалондарында қазіргі сегізінші буын Camry седанының бастапқы құны 18.7 миллион теңгеден сатылып жатыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
