Танымал қазақстандық стендап-комик Нұрлан Сабуровқа Ресей аумағында жаңа кәсіпкерлік субъектілерін ашуға 2029 жылдың көктеміне дейін ресми түрде тыйым салынды, деп хабарлайды Ertenmedia.kz. Көрші елдің салық органдары өнер иесіне тиесілі медиа компанияның тіркеу деректеріндегі кемшіліктерді алға тартып, оның жаңа заңды тұлға құру құқығын түбегейлі шектеп тастады.
Мекенжайдағы қателік пе, әлде ресми сылтау ма?
Ресейдің Федералдық салық қызметінің ресми тізіліміндегі мәліметтерге сәйкес, комикке қатысты салынған шектеу 2029 жылдың 25 наурызына дейін қолданыста болады. Мұндай қатаң шешімге оның құрылтайшылығымен құрылған «Сабр Продакшн» серіктестігінің заңды құжаттарындағы сәйкессіздіктер себеп болған.
Көрші мемлекеттің заңнамасына сай, егер кәсіпорынның заңды тұлғалар тізілімінде көрсетілген мекенжайы дұрыс болмай шықса немесе жалған деп танылса, оған арнайы күмәнді белгі қойылады. Осындай тіркеу кемшілігі бар фирманың жетекшісі мен бақылаушы үлесіне ие қожайыны үш жыл бойы жаңа компания құру немесе оны басқару құқығынан айырылады. Сабуровтың жағдайында салық органдары дәл осы мекенжайдың сәйкессіздігін негіз еткен.
Шоумен «Сабр Продакшн» кәсіпорнын былтыр фильмдер мен түрлі телевизиялық бағдарламалар түсіріп, оларды медиа нарықта тарату мақсатында тіркеген еді.
Серіктестік бір жылдың ішінде 14,3 миллион рубль (шамамен 80 миллион теңге) таза табыс тапқан. Алайда биыл күзде салық қызметі табысы мол бұл өндірістік фирманы ресми тізілімнен біржола шығару және мәжбүрлі түрде тарату рәсімін бастап кетті.
Сахнадан қуу, 50 жылдық тыйым және елге оралу
Нұрлан Сабуровтың ресейлік бизнесі төңірегіндегі дау оған бұған дейін салынған санкциялардың жалғасы іспетті. Осы жылдың басында Мәскеу билігі қазақстандық әртіске Ресейге кіруге тұтас 50 жыл мерзімге тыйым салған еді. Сабуров Дубайдан Мәскеудің Внуково әуежайына ұшып келген кезде шекаралық бақылаудан өткізілмей, қолына тиісті қаулы табысталып, сол күні Алматыға кері қайтарылған болатын.
Ол кезде ресейлік құзырлы органдар шектеуді «ұлттық қауіпсіздік мүддесімен», әскери саясатқа сын көзбен қараумен және миграциялық ережелерді бұзумен түсіндірген. Осы оқиғалардан кейін комиктің жұбайы Диана да көрші елдегі кәсіпкерлік нысандарын жауып, балаларымен бірге Алматыға түбегейлі қоныс аударды.
Қазақ өнерпаздарына қысым күшейді ме?
Мәскеу сахнасында жарқырап, миллиондаған көрерменнің ықыласына бөленген қазақстандық дарынды жастардың Ресей нарығынан біртіндеп ығыстырылуы соңғы уақытта тұрақты сипат алып келеді.
Әуелі концерттер мен гастрольдік сапарларды бұғаттау, одан кейін елге кіруіне жарты ғасырлық шектеу қою, ал енді олардың кәсіпкерлік қызметін заң жүзінде бұғаттау — жүйелі түрде жүргізіліп жатқан саясатты аңғартады. Ресейлік идеологияның қатаң қалыбына сыймаған, саяси адалдық танытудан тартынған шетелдік танымал тұлғалар осылайша экономикалық және шығармашылық тұрғыдан шеттетілуде.
Салықтық мекенжай секілді техникалық қателікті ту етіп, әртістің коммерциялық жолын төрт жылға кесу — көрші елдің шоу-бизнес кеңістігінің шетелдік өнерпаздар үшін қаншалықты қауіпті, тұрақсыз әрі саясиландырылған ортаға айналғанының тағы бір айқын дәлелі.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
