АҚШ президенті Дональд Трамп қытайлық тыңшымен байланысы бар деген күдікке ілінген әрі өзінің жақын одақтасы саналатын Nvidia басшысы Дженсен Хуангты қорғап сөйледі. Президент технологиялық миллиардердің шетелдік шпионаж операциясы туралы ештеңе білмегеніне және оқиғадан бейхабар болғанына сенетінін жеткізді, деп хабарлайды Ertenmedia.kz.
Ақ үйде өткен баспасөз мәслихатында Трамп Дженсен Хуангпен арнайы сөйлескенін мәлімдеді. Америка көшбасшысының айтуынша, жасанды интеллект нарығының көшбасшысы саналатын кәсіпкер өзінің жеке қарым-қатынаста болған серігі Қытай барлау қызметіне жұмыс істейді деп ешқашан күдіктенбегенін айтқан.
«Мен оған шын жүректен сенемін. Оның жағдайы жақсы болады деп ойлаймын. Мен Дженсенді өте жақсы білемін, ол – аса құрметті азамат», – деді Дональд Трамп.
Марко Рубио ескерткен құпия баяндама
Жанжалдың мәні тереңде жатыр. Мәліметтерге қарағанда, Дженсен Хуанг серіктес компаниялардың бірінің өкілі болған Элис Хуанг есімді әйелмен некеден тыс байланыста болғанын мойындаған. Алайда АҚШ арнайы қызметтері бұл әйелді Бейжіңнің барлау құрылымдарымен тығыз байланысты тыңшы ретінде бақылауға алған.
ФТБ мамандары Элис Хуангтың қаржылық шығындары мен сатып алу қабілеті оның ресми қызметіне сай келмей, күрт артқанын анықтаған. Осы деректер негізінде биыл мамыр айында АҚШ-тың мемлекеттік хатшысы Марко Рубио арнайы құпия құжат әзірлеп, шағын топтағы жоғары лауазымды шенеуніктерге таратқан. Дереккөздердің айтуынша, Рубио бұл жайтты Трамп Қытайға Си Цзиньпинмен кездесуге бара жатқан президенттік бортының ішінде де ескерткен.
Nvidia акциялары мен ұлттық қауіпсіздік мәселесі
Аталған шпиондық жанжал АҚШ саяси ортасында үлкен дүмпу туғызды. Себебі Дженсен Хуанг пен оның компаниясы АҚШ-тың жасанды интеллект стратегиясын түзуге және чип өндірісіне тікелей ықпал етіп келеді. Қазіргі таңда ФТБ бұл іс бойынша жан-жақты тергеу жүргізіп жатыр, ал АҚШ Конгресінің комитеттері Хуангпен жабық тыңдау өткізуді талап етуде.
«Директорлар кеңесі ұлттық қауіпсіздік немесе Nvidia құпияларының сыртқа шыққанына ешқандай негіз таппаса да, арнайы тәуелсіз тексеру қолда бар барлық ақпаратты мұқият зерттейді», – деп мәлімдеді корпорация басшылығы.
Дау корпорацияның нарықтағы жағдайына да кері әсерін тигізбей қоймады. Компания акциялары бірден 4 пайыздан астам құлдырап, оның нарықтық құны 250 миллиард долларға жуық төмендеді. Сонымен қатар инвесторлар сотқа ұжымдық талап-арыз дайындап жатыр. Қытай сыртқы істер министрлігі бұл айыптауларды негізсіз жала деп бағаласа, Вашингтон жасанды интеллект чиптерінің сыртқа кетуіне қатысты бақылауды одан әрі күшейтуді көздеп отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
