Қазақстанда 15 тамыздан 30 қыркүйекке дейін «Назар аударыңыз – балалар!» жедел-профилактикалық іс-шарасы өтіп жатыр. Полиция оқу жылы басталған кезеңде балалардың жолдағы, мектептегі және күнделікті ортадағы қауіпсіздігін күшейтуге кірісті, – деп жазады Ertenmedia.kz.
Іс-шара аясында мектеп автобустарының техникалық жағдайы мен оқушыларды тасымалдау қауіпсіздігі тексерілуде. Құқық қорғау қызметкерлері білім ошақтарының маңындағы жолдарды, жаяу жүргіншілер өткелдерін және ескерту белгілерін де бақылауға алды. Анықталған кемшіліктер бойынша жауапты мекемелерге тиісті шара қабылдау жөнінде нұсқама беріліп жатыр.
Мектеп ішіндегі қауіпсіздік жүйесіне де ерекше назар аударылған. Бейнебақылау камераларын полицияның жедел басқару орталықтарына толық қосу жұмысы жалғасуда. Мұндай байланыс төтенше немесе күмәнді жағдайды жедел анықтап, оған дер кезінде әрекет етуге мүмкіндік береді.
Әр мектепке жауапты полиция қызметкері бекітілген. Олар оқушылармен кездесіп, жол қозғалысы мен жеке қауіпсіздік талаптарын түсіндіреді. Балаларға түрлі жағдайда дұрыс шешім қабылдау, қауіп төнген кезде көмек сұрау және күмәнді әрекеттер туралы ересектерге хабарлау жолдары үйретілуде.
Полиция өкілдері бала қауіпсіздігін тек құқық қорғау органдары мен мектептің міндеті ретінде қабылдамауға шақырды. Отбасы ішіндегі тұрақты түсіндіру жұмысы баланың қауіпті алдын ала байқап, өзін дұрыс ұстауына көмектеседі. Сондықтан ата-аналарға күн сайын баласымен бірнеше минут қауіпсіздік туралы сөйлесу ұсынылды.
Балаға жолды тек белгіленген жаяу жүргіншілер өткелі арқылы өту керектігін үнемі еске салған жөн. Жолға шығарда екі бағытқа қарап, көлік қозғалысына көз жеткізу және телефонға алаңдамау маңызды. Бейтаныс адамдармен сөйлеспеу, олардың көлігіне отырмау немесе бірге кетпеу қағидасы да тұрақты түсіндірілгені дұрыс.
Балалар да өз қауіпсіздігіне жауапкершілікпен қарауы керек. Қауіпті немесе күмәнді жағдайға тап болғанда үндемей қалмай, ата-анасына, мұғаліміне немесе полиция қызметкеріне дереу хабарлағаны жөн. Уақтылы айтылған ақпарат ауыр жағдайдың алдын алуы мүмкін.
Баланың мектепке аман барып, үйіне қауіпсіз оралуы полицияның, педагогтердің, жүргізушілердің және ата-аналардың бірлескен әрекетіне байланысты. Қарапайым ережелерді күнделікті сақтау жазатайым оқиғалардың қаупін азайтады. Балаларды қорғау үлкендердің ортақ жауапкершілігі әрі қоғамның қауіпсіздік мәдениетін айқындайтын маңызды өлшем саналады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
