Қазақстанда ескі үлгідегі 2000 және 10 000 теңгелік банкноттардың жаңа купюралармен қатар жүру мерзімі биыл аяқталады, деп жазады Ertenmedia.kz.
Ұлттық банк жаңа банкноттар айналымға шыққан кезде белгілі бір уақыт бойы ескі және жаңа купюралардың қатар қолданылатынын еске салды. Осы кезеңде азаматтар екі үлгідегі ақшамен де сауда жасай алады, төлем жүргізеді және қажет болса, ескі банкноттарды жаңасына айырбастай алады. Бұл уақыт банктерге банкоматтар мен кассалық жабдықтарын жаңа банкноттарға бейімдеуге де қажет.
2026 жылы 2012 жылғы үлгідегі, «Қазақ Елі» монументі бейнеленген 2000 және 10 000 теңгелік банкноттардың қатар айналым мерзімі аяқталады.
10 000 теңгелік ескі банкноттар 2024 жылғы 28 маусымнан 2026 жылғы 27 маусымға дейін қатар айналымда болады. Ал 2000 теңгелік банкноттар бойынша бұл мерзім 2024 жылғы 25 желтоқсаннан 2026 жылғы 24 маусымға дейін белгіленген.
Ұлттық банк 10 000 теңгелік банкноттарға қатысты мерзімді ұзарту мүмкіндігін қарастырып жатқанын хабарлады. Себебі бұл купюра халық пен кәсіпкерлер арасында ең көп қолданылатын банкноттардың бірі саналады.
Қатар айналым мерзімі аяқталғаннан кейін де азаматтар ескі банкноттарды бірден жарамсыз ақша деп қабылдамауы керек. Оларды екінші деңгейлі банктер мен «Қазпошта» бөлімшелерінде 2029 жылғы 25 маусымға дейін айырбастауға болады. Ал Ұлттық банк филиалдарында мұндай банкноттарды айырбастау мерзімсіз жүргізіледі.
Сонымен қатар Ұлттық банк жаңа «Сақ стилі» сериясындағы соңғы банкнот – 20 000 теңгені жыл соңында шығаруды жоспарлап отыр.
Осылайша, елдегі ұлттық валюта біртіндеп жаңа дизайнға көшіп жатыр. Азаматтарға ескі 2000 және 10 000 теңгелік банкноттарды қолма-қол айналымда қолдану мерзімін ескеріп, қажет болған жағдайда банк немесе «Қазпошта» арқылы уақытында айырбастап алған дұрыс.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
