ҚР Энергетика министрлігі мен Kazakhstan Success Coking Energy Қарағанды облысында жылына 1 млн тонна металлургиялық кокс өндіретін зауыт салу жобасы бойынша инвестициялық келісімге қол қойды, деп жазады Ertenmedia.kz.
Құжатқа Энергетика министрі Ерлан Ақкенженов және Success Group компаниясының акционері, басқарма төрағасы Цзинь Шэн қол қойды. Келісім Қазақстан Үкіметінің қаулысымен мақұлданған.
Жоба еліміздегі алғашқы көмір-химия бағытындағы ірі бастамалардың бірі болмақ. Қарағанды облысында толық циклді заманауи өндірістік кешен салу жоспарланып отыр. Кәсіпорын кезең-кезеңімен іске қосылады.
2029 жылы зауыт жылына 500 мың тоннаға дейін металлургиялық кокс өндіре бастайды. Ал 2031 жылы толық қуатына шығып, жыл сайын 1 млн тонна өнім шығаруға мүмкіндік алады.
Жобаның жалпы инвестиция көлемі 63,5 млрд теңгені құрайды. Сонымен қатар жаңа кәсіпорында 500-ге дейін тұрақты жұмыс орны ашылады деп күтілуде.
Инвестор өндіріс барысында отандық тауарларға, жұмыстар мен қызметтерге басымдық беруді көздеп отыр. Сондай-ақ қазақстандық мамандарды даярлау, оқыту және кәсіби біліктілігін арттыру мәселесіне ерекше көңіл бөлінбек.
Кәсіпорын іске қосылғаннан кейін компания Қарағанды облысындағы әлеуметтік және инфрақұрылымдық жобаларды қаржыландыруға да қатысуды жоспарлап отыр. Мұндай міндеттеме өндірістің өңір экономикасына ғана емес, жергілікті әлеуметтік ортаға да ықпал етуін көздейді.
Жобаның басты ерекшелігі – толық циклді өндірістік технологияны енгізу. Кешен көмір өндіру, кокстеу, металлургиялық кокс шығару және электр энергиясын генерациялау бағыттарын біріктіреді. Металлургиялық кокс болат балқыту кезінде металлургия өндірісінде қолданылатын маңызды шикізат саналады.
Жобаны жүзеге асыру Қазақстанда заманауи көмір-химия кластерін қалыптастыруға мүмкіндік береді. Сонымен бірге жоғары қосылған құны бар өнім өндірісі кеңейіп, ішкі нарықтың қажеттілігі қамтамасыз етіледі. Экспорттық әлеуетті арттыру тұрғысынан да Қарағандыдағы жаңа зауыт өнеркәсіп саласына қосымша серпін беруі мүмкін.
Қарағанды облысы үшін мұндай өндіріс өңірдің дәстүрлі көмір және металлургия базасын жаңа технологиялық деңгейге көтеретін жоба ретінде қаралады. Шикізатты терең өңдеу, тұрақты жұмыс орны және энергия өндіру мүмкіндігі бір кешеннің ішінде тоғысса, аймақтың өнеркәсіптік салмағы күшейе түседі.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
