Kaspi.kz Түркияның Банктік реттеу және қадағалау агенттігінен, яғни BDDK-дан Rabobank A.Ş.-ті сатып алуға рұқсат алғанын хабарлады. Компания мәміле барлық стандартты талаптар орындалған жағдайда 2026 жылдың шілде айында аяқталады деп күтеді, деп жазады Ertenmedia.kz.
Kaspi.kz басшысы әрі негізін қалаушылардың бірі Михаил Ломтадзе бұл шешімді компания үшін маңызды кезең деп атады. Оның сөзінше, BDDK мақұлдауы Kaspi.kz-тің түрік нарығындағы бизнесін дамытуға жол ашады.
– Түркиядағы Rabobank A.Ş.-ті сатып алуға BDDK мақұлдауын алғанымызға қуаныштымыз. Бұл Kaspi.kz үшін маңызды кезең және түрік нарығында бизнесімізді дамытудағы үлкен жетістік, – деді Михаил Ломтадзе.
Ол реттеуші орган мен тиісті мекемелерге бірлескен жұмыс үшін алғыс айтты. Мәміле аяқталғаннан кейін Kaspi.kz Түркияда төлемдер, электрондық коммерция және қаржытех саласындағы тәжірибесін қолдануды жоспарлап отыр.
Компания Түркиядағы тұтынушылар мен кәсіпкерлер үшін цифрлық мүмкіндікті кеңейткісі келеді. Kaspi.kz Қазақстанда суперқосымша арқылы төлем, маркетплейс, финтех, саяхат, мемлекеттік қызмет және күнделікті өмірге қажет сервистерді біріктірген ірі технологиялық экожүйе ретінде танылған.
Бұған дейін Kaspi.kz Rabobank Group-пен Rabobank A.Ş.-ті сатып алу туралы акцияларды сатып алу-сату шартына қол қойған еді. Rabobank A.Ş. Түркияда лицензиясы бар банк саналады. Алайда оның қарыз алушы клиенттері, салымшылары және филиалдық желісі жоқ.
Түркия Kaspi.kz үшін жаңа әрі ірі нарыққа айналып келеді. Компания қазірдің өзінде елдегі жетекші электрондық коммерция платформаларының бірі Hepsiburada-ға иелік етеді. Сондықтан Rabobank A.Ş.-ті сатып алу Kaspi.kz-тің Түркиядағы қаржытех және e-commerce бағытын күшейтетін келесі қадам болуы мүмкін.
Kaspi.kz сервистерін Қазақстан мен Түркияда 25 миллионнан астам клиент және 900 мың серіктес пайдаланады. Компания түрік нарығында қазақстандық цифрлық модельді бейімдеп, төлемдер мен сауда сервистерін бір экожүйеге біріктіруге мүдделі.
Мәміле аяқталса, Kaspi.kz Түркиядағы қаржы және технология нарығында институционалдық негізін күшейтеді. Бұл қазақстандық технологиялық компанияның халықаралық деңгейдегі экспансиясын жалғастырып жатқанын көрсетеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
