24 қазан күні Қазақстанның басым бөлігінде түнде ауа температурасы нөлден төмен түсіп, күзгі суық күшейе түседі, деп хабарлайды Ertenmedia.kz.
«Қазгидромет» мәліметінше, елдің орталығында, солтүстігі мен шығысында қар жауып, көктайғақ қалыптасуы ықтимал. Сонымен қатар оңтүстік және батыс аймақтардың кей тұсында екпінді желмен бірге шаңды дауыл көтерілуі мүмкін.
Синоптиктердің болжамынша, республиканың басым аумағында түнгі уақытта ауа температурасы минусқа дейін төмендейді, ал солтүстік пен шығыста көктайғақ күтіледі.
Астана, Алматы және Шымкенттегі ауа райы
Елордада көшпелі бұлт шығады, жауын-шашын күтілмейді. Желдің жылдамдығы секундына 5–10 метр шамасында болады. Түнде сынап бағанасы -5…-7 градусқа дейін түсіп, күндіз +2…+4 градусқа көтеріледі.
Алматыда ауа райы жауын-шашынсыз, құбылмалы бұлтты. Жел 3–8 м/с жылдамдықпен соғады. Түнгі сағаттарда ауа -2…-4 градусқа дейін салқындаса, күндіз термометр бағаны +4…+6 градусты көрсетеді.
Шымкентте күн ашық болады, бірақ желдің күші 8–13 м/с, ал екпіні 15–20 м/с дейін күшейеді. Түнде +2…+4 градус болғанымен, топырақ бетінде үсік сақталады. Күндіз ауа температурасы +13…+15 градус жылы болады.
Орталық, солтүстік және шығыс өңірлер
Қарағанды қаласында түнгі температура -6…-8 градусқа дейін түсіп, күндіз небәрі 0…+2 градус деңгейінде сақталады. Жезқазғанда түнде -3…-5 градус, күндіз +3…+5 градус болады.
Солтүстік облыстарда да күн райы салқын. Көкшетауда түнде -4…-6 градус, күндіз +4…+6 градус жылылық сезіледі. Қостанайда түнгі ауа температурасы -4…-6 градус, күндіз +8…+10 градусқа жетеді. Павлодарда түнде -4…-6, күндіз +1…+3 градус жылы. Ал Петропавлда түнде -4…-6 градус аяз, күндіз +5…+7 градус, желдің екпіні 15–20 м/с жетуі мүмкін.
Шығыс аймақтарда күндізгі уақытта да төмен көрсеткіш байқалады. Семейде түнде -3…-5, күндіз -1…-3 градус төңірегінде болады. Өскеменде де ұқсас жағдай қалыптасады: түнде -4…-6 градус, күндіз -1…-3 градус шамасында суық күтіледі.
Батыс пен оңтүстік облыстар
Ақтөбеде күн ашық, жауын-шашынсыз. Ауа температурасы түнде -2…-4 градус, күндіз +10…+12 градусқа дейін көтеріледі. Атырауда түнде +5…+7, күндіз +14…+16 градус жылы болады. Ақтауда түнгі уақытта +8…+10, күндіз +17…+19 градус күтіледі.
Қызылордада түнде 0…+2 градус, күндіз +10…+12 градус аралығында болып, екпіні 15–20 м/с жететін жел байқалады. Қонаевта түнде -2…-4 градус суық, күндіз +5…+7 градус жылы. Талдықорғанда түнгі температура -3…-5 градусқа төмендеп, күндіз сынап бағанасы +3…+5 градусты көрсетеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
