АҚШ Мемлекеттік хатшысы Марко Рубио 2026 жылы Орталық Азия елдеріне сапар шегетінін мәлімдеді деп хабарлайды Ertenmedia.kz.
Америка сыртқы саясат ведомствосының басшысы бұл мәлімдемесін АҚШ Конгресі Өкілдер палатасының сыртқы істер жөніндегі комитетіндегі тыңдауда айтты.
«Біз биыл аймақ елдерімен С5+1 форматында кездесу өткізуді жоспарлап отырмыз, мен де осы кездесуге қатысу үшін Орталық Азияға барамын», – деді Рубио.
Сонымен қатар, ол Президент Дональд Трамп әкімшілігінің Орталық Азия елдерімен сауда қарым-қатынасына шектеу қоятын Джексон–Вэник түзетуін жоюды қолдайтынын атап өтті.
«Бұл шешім барлық тарапқа пайдалы болар еді», – деді Рубио.
1974 жылы енгізілген Джексон–Вэник түзетуі адам құқығын бұзатын елдермен сауда қарым-қатынасын шектеуді көздейді. Қазақстан АҚШ-қа бұл шектеуді алып тастау туралы бірнеше рет ұсыныс жасағанымен, мәселе әлі де шешімін таппай келеді.
Түзету бүгінге дейін алты ТМД мемлекетіне қатысты күшін жойған: Қырғызстан, Грузия (екеуі де 2000 жылы), Армения (2004), Украина (2005), Молдова мен Ресей (екеуі де 2012 жылы).
C5+1 форматы – АҚШ пен Орталық Азия елдері арасындағы ортақ мәселелерді шешуге арналған платформа. Бұл бастама Қазақстан, Қырғызстан, Тәжікстан, Түрікменстан және Өзбекстанмен екіжақты қарым-қатынасты толықтырып, аймақтық деңгейде бірлескен әрекет етуді көздейді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
