АҚШ президенті Дональд Трамп Азия елдеріне жасаған сапарынан оралған соң, Ақ үйде кең көлемді баспасөз мәслихатын өткізіп, халықаралық шиеленістер мен Қытайдағы үшжақты кездесу нәтижелерін баяндады, деп хабарлайды Ertenmedia.kz.
Мемлекет басшысының жанында вице-президент Джей Ди Вэнс пен Мемлекеттік хатшы Марко Рубио болды. Баспасөз жиынында Таяу Шығыстағы қақтығыс, Азия-Тынық мұхиты экономикалық ынтымақтастығы саммиті аясында өткен келіссөздер және елдің ішкі мәселелері талқыланды.
Жиындағы басты тақырыптың бірі Парсы шығанағындағы әскери ахуал болды. Президент Трамп Тегеран билігінің бейбіт мәмілеге келуге шынайы ұмтылмай, уақыт созу тактикасына көшкенін алға тартты.
«Олар келісім жасасқысы келеді, бірақ біз қабылдайтын шарттарға көнгісі жоқ. Бізге соңғы жарты ғасыр бойы айтылып келген бос сөз емес, нақты әрі шынайы келісім қажет», – деп мәлімдеді Трамп.
АҚШ лидері шиеленістің жаһандық мұнай нарығына ықпалын атап өтті. Оның айтуынша, соңғы кездері мұнай бағасының арзандауы ішкі тұтынушылар үшін оң көрсеткіш саналады.
Шэньчжэньде өткен үшжақты кездесу
Трамп Қытайдың Шэньчжэнь қаласында ҚХР төрағасы Си Цзиньпин және Ресей президенті Владимир Путинмен өткен үшжақты басқосуды жоғары бағалады. Ол бұл кездесуді тарихи оқиға деп атап, Вашингтонның келіссөздерге мықты позициямен келгенін жеткізді.
«Құрама Штаттар бұл сапарға теңдессіз экономикалық және дипломатиялық қуатпен аттанды», – деп атап өтті АҚШ президенті.
Келіссөздер барысында ядролық қаруды таратпау, жаһандық отын нарығын реттеу және халықаралық құрылымдарды реформалау мәселелері көтерілген. Сонымен қатар, Трамп Си Цзиньпинмен жасанды интеллект саласын бірлесе реттеу ережелері жөнінде пікір алысқанын хабарлады. Ресей-Украина бағытында да диалогтың жалғасатыны сөз болды.
Киберқауіпсіздік пен кадрлық өзгерістер
Брифинг барысында ел ішіндегі соңғы техникалық іркілістер де сөз болды. Мемлекеттік жүйелерде орын алған ақаулардан кейін Ақ үй Ұлттық кибердиректоры қызметіндегі ауыс-түйіс туралы ақпарат нақтыланды. Трамп әкімшілігі инфрақұрылымның қауіпсіздігін нығайту үшін қатаң бақылау шаралары енгізілетінін мәлімдеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!







